Ժողովուրդը ինքը կորոշի, թե ում տալ իր ձայնը. Դավիթ Բաբայան

Lurer.com-ը զրուցել է Արցախի նախագահական ընտրությունների թեկնածու Բակո Սահակյանի մամլո խոսնակ Դավիթ Բաբայանի հետ, ով տեղեկացրել է նախընտրական քարոզչության ընթացքի մասին:

Նրա փոխացմամբ, Բակո Սահակյանը հուլիսի 14-ին այցելել է Ասկերանի շրջանի Նախիջևանիկ, Վարդաձոր, Սառնաղբյուր, Արանզամին, Ուղտասար, Խրամորթ, Փառուխ, Արմենակավան, Խնապատ, Ասկերան, Այգեստան, Լուսաձոր, Բերքաձոր, Խնածախ համայնքներ եւ հանդիպել տեղի բնակիչների հետ, ներկայացրել իր նախընտրական ծրագիրը, խոսել նրա առանձին կետերի մասին, անդրադարձել այս հինգ տարիների ընթացքում Ասկերանի շրջանում իրականացված աշխատանքներին և նախանշվող ծրագրերին:

Նախագահի թեկնածուն ընդգծել է, որ հանրապետական կարևորագույն մայրուղիներին եւ մայրաքաղաք Ստեփանակերտին մոտ գտնվելը բարենպաստ պայմաններ է ստեղծում շրջանի բնակավայրերի սոցիալ-տնտեսական զարգացման համար: Այս առումով նա հատկապես կարևորել է Հյուսիս-Հարավ, Ստեփանակերտ-Ակնա-Մարտակերտ մայրուղիները, ինչպես նաև Ստեփանակերտի օդանավակայանը, որը շուտով շահագործման կհանձնվի:

Դավիթ Բաբայանը տեղեկացրել է նաև, որ Բակո Սահակյանը այսօր հանդիպել է նաև ԼՂՀ մշակույթի և երիտասարդության հարցերի նախարարության, զբոսաշրջության վարչության, սպորտի պետական կոմիտեի աշխատակիցների հետ:

Ըստ նրա, դեռևս որոշված չէ եզրափակիչ հանդիպման ամսաթիվն ու վայրը :

«Ժողովուրդը ինքը կորոշի, թե ում տալ իր ձայնը, իսկ ես, քանի որ համարվում եմ պարոն Սահակյանի թիմակիցը, ուզում եմ, որպեսզի վերջինս դառնա նախագահ»,- ասել է խոսնակը՝ չփորձելով գնահատել թեկնածուներ Վիտալի Բալասանյանի և Բակո Սահակյանի նախագահ դառնալու հնարավորությունները, սակայն ավելացնելով, որ ամեն դեպքում ընտրությունները կլինեն թափանցիկ և արդար: