Օպերայի «ազատագրո՞ւմ», թե՞ քաղաքական վենդետա

Հետհեղափոխական «Թողեք աշխատեն» հեշթեգին, կարծես թե, փոխարինելու է գալիս «Թողեք աշխատենքը»: Այսօր Օպերայի հարակից տարածքում ոստիկանների հետ բախման հանգեցրած ակցիայի պատճառը Երևանի Ազատության հրապարակին մերձակա սրճարանների փակումն է: Գործունեությունն ամբողջությամբ կդադարեցնեն «Ռիչ», «Մոնտալ», «Շոկոլադնիցա», «Ատլանտիկ» և «Ջազզվե» սրճարանները: Ըստ քաղաքապետ Հայկ Մարությանի վերջնական որոշման՝ սկսվել է Երեւանում կանաչ տարածքների վերականգնման եւ զարգացման գործընթացը, որն իր մեջ ներառում է նաև Օպերայի հարակից տարածքում «քաղաքի սեփականությունը հանդիսացող հողամասերը վարձակալած եւ բիզնես ծավալած տնտեսվարողների» սրճարանները։ Քաղաքապետարանը պլանավորել է այս տարվա սկզբից կանաչապատել տարածքը՝ այն բետոնե ծածկույթից ազատելուց հետո։

Սակայն, անչափ ուշագրավ է, թե ովքեր են վերոնշյալ «բիզնես ծավալած տնտեսվարողները»: Օրինակ՝ քաղաքապետարանի որոշմամբ ապամոնտաժման ենթակա «Ջազզվե» սրճարանի համասեփականատերերն են Սերժ Սարգսյանի փեսա, Վատիկանում ՀՀ նախկին դեսպան Միքայել Մինասյանը և Արմենիա հեռուստաընկերության սեփականատեր, «Գազպրոմ-Մեդիա»-ի նախկին ղեկավար Արթուր Ջանիբեկյանը: Ի դեպ, ճակատագրի հեգնանքով, սրճարանների ապամոնտաժման «դրոշակակիրը» և կուրատորը՝ Կենտրոնի թաղապետ Վիկտոր Մնացականյանն է: Ինչո՞ւ ճակատագրի հեգնանքով: Այն պարզ պատճառով, որ Միքայել Մինասյանը Մնացականյանի կնքահայրն է, իսկ Ջանիբեկյանը՝ զարմիկը:

Մյուս սրճարանը՝ «Ատլանտիկ»-ը, ըստ որոշ տեղեկությունների, պատկանում է Արաբկիր համայնքի հարկայինի նախկին պետ Արսեն Ղազարյանին: Թիրախում հայտնված մեկ այլ սրճարան՝ «Շոկոլադնիցան», պատկանում է ՀՅԴ-ական Միքայել Մանուկյանին։ Այս սրճարանը, սակայն, վերջին պահին «փրկվել» է, քանի որ դատական կարգով ապացուցել է իր գործունեության օրինականությունը: 

Ի՞նչն է միավորում վերոնշյալ անձանց, ճիշտ է՝ բոլորն էլ այս կամ այն չափով ասոցացվում են նախկին իշխանությունների հետ, ոմանք՝ ազգակցական կապերով, ոմանք էլ՝ քաղաքական կոալիցիաներով և նախկին իշխանությունների օրոք զբաղեցրած պաշտոններով: 

Ի դեպ, այս ֆոնին անչափ ուշագրավ է, որ օրինակ՝ «Ռիչ» սրճարանի միայն այգու հատվածն է փակվում, իսկ երկրորդ գծում գործող սրճարանը շարունակելու է աշխատել: Քաղաքապետարանի ծրագրից առհասարակ դուրս է մնացել  օպերայի հարակից տարածքում գործող «Սանտրոպե» սրճարանը: Այս երկու սրճարանները, ըստ տարածված լուրերի, պատկանում են գործարար Սամվել Ալեքսանյանի մերձավորներին: Սամվել Ալեքսանյանը, ինչպես գիտենք, ՀՀԿ ֆինանսական «կտուրներից» մեկն էր, սակայն, հեղափոխության առաջին իսկ օրերից սկսած ճկուն կերպով հարմարվել է նոր իրավիճակին:

Մի կողմից մեզ փորձում են համոզել, որ միակ նպատակը Կենտրոնը Երևանի բնակիչներին վերադարձնելն է և կանաչապատելը, մյուս կողմից՝ ընտրված լուծումը ամենածայրահեղն է ստեղծված պայմաններում՝ քաղաքապետարանը ուղղակիորեն հարվածում է գործող բիզնեսին՝ չառաջարկելով որևէ ռեալ այլընտրանք: Տպավորություն է ստեղծվում, որ իշխանությունների նպատակը բնավ էլ Երևանը ամեն գնով «անխնա» կանաչապատելը չէ, առնվազն՝ ոչ միայն դա է. այս ամենը անչափ նման է քաղաքական հաշվեհարդարի, մինչդեռ, հենց վարչապետ Փաշինյանն է  բազմիցս հայտարարել, որ նախկին իշխանության ներկայացուցիչների հանդեպ Նոր Հայաստանում քաղաքական վենդետա չի լինելու: Մինչդեռ, մենք տեսնում ենք, որ Փաշինյանի թիմակից Հայկ Մարությանը չի խորշում նման մանր հաշվեհարդարներից, անգամ, եթե դրա դիմաց վճարելու են հասարակ քաղաքացիները՝ ընդ որում բավական թանկ գին: Այս համատեքստում արժե նաև հիշեցնել, որ նույն Մարությանը, իր դերասանական կարիերայում հաջողությունների է հասել հենց Միքայել Մինասյանի և Արթուր Ջանիբեկյանի հետ մեկ թիմում աշխատելիս․ գաղտնիք չէ, որ երկար տարիներ Մարությանի պրոդուկտները գնել է հենց Արմենիա ԹիՎին: Այսօր, սակայն, Մարությանի «դերը» փոխվել է, և նա մոռացել է երկար տարիներ նույն Ջանիբեկյանի և Մինասյանի հետ պրոդուկտիվ համագործակցության մասին...այսօր Մարությանը քաղաքականության մեջ է,  իսկ քաղաքական շահերը փաստացի այլ բան են պահանջում...

Ստելլա Խաչատրյան