Հայաստան կժամանի ԻԻՀ փոխնախագահ Մոհամմադ Ջավադ Մոհամմադիզադեհը

Այսօր եռօրյա պաշտոնական այցով Հայաստան է ժամանելու Իրանի Իսլամական Հանրապետության փոխնախագահ և բնապահպանական կազմակերպության նախագահ Մոհամմադ Ջավադ Մոհամմադիզադեհի գլխավորած պատվիրակությունը:

Դեռևս 2011թ դեկտեմբերին ՀՀ բնապահպանության նախարարի և ԻԻՀ փոխնախագահ, բնապահպանական կազմակերպության նախագահ Մոհամմադ Ջավադ Մոհամմադիզադեհի հանդիպման ժամանակ ձեռք էր բերվել համաձայնություն երկու երկրների ընդհանուր սահմանում Անդրսահմանային պահպանվող տարածք ստեղծելու մասին, որը պետք է օգտագործվեր բարեկամության և խաղաղության այգի կառուցելու նպատակով:

2012թ մարտի 3-ից 5-ը Իրանի Իսլամական Հանրապետություն ՀՀ բնապահպանության նախարար Արամ Հարությունյանի գլխավորած պատվիրակության այցի ժամանակ երկու կողմերի միջև ստորագրվել էր «Բնապահպանական համագործակցության հուշագիր»: Հուշագրի առանցքային կետերն են Արաքս գետի հայ-իրանական մոնիթորինգի իրականացման, ջրի որակի բարելավման և աղտոտման աղբյուրների նկատմամբ հսկողության իրականացումը, անդրսահմանային պահպանվող տարածքի ստեղծման հարցերը, բնապահպանական կրթական հարցերով ուսանողների փոխայցելությունների կազմակերպումը:

Այսօրվա այցի նպատակն է քննարկել Արաքս գետի ջրօգտագործման խնդիրները, անդրսահմանային Խաղաղության այգու (պարկի) հիմնման հարցերը:

ՀՀ բնապահպանության նախարար Արամ Հարությունյանի և ԻԻՀ փոխնախագահ Մոհամմադ Ջավադ Մոհամմադիզադեհի կողմից կստորագրվի Փորձագիտական խմբերի իրականացրած աշխատանքների արդյունքում կազմված արձանագրությունը: