«Հարսնաքարի» դեպքը Ռուբեն Հայրապետյանի ոչ առաջին հանցագործությունն է, ոչ էլ վերջինը. Զարուհի Հովհաննիսյան

Lurer.com-ի զրուցակիցն է հրապարակախոս, «Պահանջում ենք պատժել «Հարսնաքարում» տեղի ունեցածի բոլոր մեղավորներին» նախաձեռնության անդամ Զարուհի Հովհաննիսյանը:

- Արտահերթ նստաշրջան անցկացնելու նախաձեռնության փաստաթղի տակ չհաջողվեց հավաքել 44 ստորագրություն: Ըստ Ձեզ ո՞րը պետք է լինի հաջորդ քայլը:

- Ես նախ կփորձեմ գնահատել այն նախաձեռնությունը, որը կյանքի չկոչվեց ԱԺ–ի կողմից։

Ինձ համար հստակ է, որ ԱԺ այն պատգամավորները, որոնք իրենց ստորագրությամբ չեն աջակցել արտահերթ նստաշրջան հրավիրելու հանրային պահանջին, պետք է պարզաբանումներ տան։ Այդ թվում նաև կոալիցիայի անդամ կամ անկախ, ես չեմ տարանջատում։ Նաև, հաշվի առնելով այն, որ ԱԺ–ն դեռ աշխատանքային ժամանակահատվածում է գտնվել, կարծում եմ, երկրից մասսայաբար բացակայելու պատճառաբանությունը մեղմ ասած հարգելի չէ։

Հիշեցնում եմ, որ սա մեր նախաձեռնության գործունեության ուղղություններից ու պահանջներից մեկն էր։ Մենք առաջիկա օրերին կհրավիրենք ասուլիս և կհստակեցնենք հետագա քայլերն ու անելիքները, որոնք վերաբերում են Ռուբեն Հայրապետյանի գործունեության բոլոր ոլորտներին և ուղղություններին։ Նման հանցագործ բարքերի քարոզիչը պետք է ենթարկվի հանրային պարսավանքի և կրի կատարվածի ողջ պատասխանատվությունը։ Սա նաև կլինի նախադեպ՝ երկրում փոխելու անպատժելիության մթնոլորտը։

- Ինչպե՞ս կգնահատեք արտահերթ նստաշրջանի նախաձեռնության գաղափարի շուրջ քաղաքական ուժերի ներգրավվածությունը և ակտիվությունը:

- Ինչպես հայտնի է, ընդամենը 21 պատգամավոր է ստորագրել այդ նախաձեռնության տակ, ինչը ուղղակի խայտառակություն է, քանի որ նման հանրայնություն ստացած խնդիրն ու պահանջը ԱԺ քիչ թվով պագամավորներ կարևորեցին։ Կոալիցիան ընդհանրապես չարձագանքեց, ավելին, ՀՀԿ պատգամավորներն ու այդ կուսակցության գործելաոճի երկրպագուները ջերմեռանդորեն պաշտպանում են Ռուբեն Հայրապետյանին ու կարծես համոզում հասարակությանը, որ նա անմասն է այս հանցագործության մեջ։ Ես դա գնահատում եմ որպես գործի արդար և թափանցիկ քննության անցկացման պատրաստակամության բացակայություն։ Դա ապացույցն է նրա, որ իշխող կուսակցությունն ունի այս խնդրի շուրջ քաղաքական որոշում, որը դուրս է իրավական հարթությունից։ ԱԺ ԲՀԿ խմբակցությունն էլ, թեև նախօրոք պատրաստակամություն էր հայտնել, սակայն գտավ դիվանագիտական ճանապարհ շրջանցելու այս հարցն ու հայտարարեց, որ իր պատգամավորները քաղաքում չեն։ Այնպես որ, ակտիվությունը ոչ բավարար է և տարբեր հետևություններով լի։

- «Պահանջում ենք պատժել «Հարսնաքարում» տեղի ունեցածի բոլոր մեղավորներին» նախաձեռնության անցած ճանապարհը և հարցի լուծման համար կատարված աշխատանքների ադրյուքները:

- Ուզում եմ ընդգծել, որ միայն հանրային ալիքի ճնշման ներքո է, որ Ռուբեն Հայրապետյանը ստիպված եղավ վայր դնել մանդատը, «Հարսնաքարի» դեպքը ոչ նրա առաջին հանցագործությունն է, ոչ էլ վերջինը կլինի, եթե չենթարկվի համապատասխան պատժի, ՀՀ օրենքի ողջ խստությամբ։ Ահա հենց դա է նպատակը, որին հասնելու բոլոր ճանապարհները մենք գործադրելու ենք։

Ազատուհի Արասխանյան