Եգիպտացիները Հիլարի Քլինթոնին ճանապարհեցին «Մոնիկա, Մոնիկա» վանկարկումներով (տեսանյութ)

ԱՄՆ պետքարտուղար Հիլարի Քլինթոնին Եգիպտոս կատարած պաշտոնական այցի ժամանակ սպասում էր ոչ այնքան ջերմ ընդունելություն: ԱՄՆ–ի արտաքին գերատեսչության ղեկավարի ելույթից հետո Ալեքսանդրիայում, որտեղ նա բացեց դեռ 1993 թվականից ֆինանսավորման բացակայության պատճառով փակված ԱՄՆ հյուպատոսությունը, պետքարտուղարի վրա նետել են լոլիկներ, հաղորդում է CNN-ը։

Միջադեպը տեղի է ունեցել կիրակի օրը, երբ Քլինթոնը լքում էր հյուպատոսության շենքը և եգիպտացի պաշտոնյաների ուղեկցությամբ քայլում էր դեպի մեքենան: Ոստիկանությունը փորձել է զսպել պետքարտուղարի ժամանման առիթով հավաքված կատաղած ամբոխին, սակայն եգիպտացիները իրենց վրդովմունք էին հայտնում Մուհամեդ Մուրսիի՝ Եգիպտոսի նախագահի պաշտոնում ընտրվելու կապակցությամբ, ում ԱՄՆ-ն իր աջակցությունն է հայտնել:

Դեպի Քլինթոնը հավաքվածները նետում էին կոշիկներ և լոլիկներ: Երբ պաշտոնյաները արդեն մեքենայի մեջ էին, հավաքվածներից մեկը մի շիշ ջուր նետեց հենց մեքենայի մեջ: ԱՄՆ-ի նախկին նախագահի կնոջ ետևից հավաքվածները վանկարկում էին. «Մոնիկա, Մոնիկա»:

Ալեքսանդրիայում իր ելույթի ընթացքում Քլինթոնը, մասնավորապես, նշել է, որ Միացյալ Նահանգները չեն խառնվում երկրի ներքին գործերին և ընտրական գործընթացին ևս չեն միջամտել: «Ես ուզում եմ շեշտել, որ Միացյալ Նահանգները չեն որոշել, թե ով է հաղթելու և ով՝ պարտվելու: Մենք այդպիսի բան չէինք անի, անգամ եթե կարողանայինք: Բայց, իհարկե, հասկանալի է, որ դա մեր ուժերից վեր է»: Ամենայն հավանականությամբ, ալեքսանդրիացիները ամերիակացի պաշտոնյային չհավատացին:

Ինչպես ընդգծում են միջազգային ԶԼՄ-ները, ինքնաբուխ բողոքի ակցիայի պատճառ դարձավ Քլինթոնի հանդիպումը Եգիպտոսի նորընտիր նախագահի հետ, որի ընթացքում նա հայտարարեց, որ Վաշինգտոնը աջակցում է Եգիպտոսի՝ դեպի քաղաքացիական կառավարման լիակատար անցումը, և որ եգիպտացիները ստացել են այն իշխանությունը, որին ընտրել են հենց իրենք: