Պերուում հայտնաբերել են Մաչու-Պիկչու տանող անհայտ ճանապարհ

Պերուացի հնագետները հայտնաբերել են դեռ ինկերի ժամանակներից անհայտ մնացած մի ճանապարհ, որը տանում է դեպի հին մայրաքաղաք Մաչու-Պիկչու, հաղորդում է Andina լրատվական գործակալությունը։

Հայտնագործությունն արել են Կուսկո շրջանի մշակույթի վարչության մասնագետները, որոնց պարտականություններից է ինկերի մայրաքաղաք տանող ավանդական ճանապարհի բարեկարգության ապահովումը։ Հիմնական ճանապարհից ոչ հեռու նրանք գտել են այլընտրանքային մի ուղի՝ 4 կմ երկարությամբ և 1.7 մետր լայնությամբ։ Այն ճյուղավորվում է Չակիկկոչա տեղանքից և կրկին միանում ավանդական ճանապարհին 33-րդ կիլոմետրի մերձակայքում։ Ճանապարհի այս հատվածը գտնվում է ծովի մակերևույթից միջինում 3600 մետր բարձրության վրա։

Ճանապարհը բարեկարգված է եղել ըստ հնդկացիական տեխնոլոգիայի՝ այն օժտված է մինչև 10 մ բարձրության հենապատերով, ջրահեռացման համակարգով, դիտակետերով և անգամ ժայռափոր թունելով։

Հնագետ Օսկար Մոնտուֆարա լա Տորրեի խոսքերով, մոտ 5 դար անց այս ճանապարհը դեռ պահպանված է 70 տոկոսով։ Դրա միայն մոտ 1/3-ն է տուժել սողանքներից։ Դրա պատերին գիտնականները հայտնաբերել են օրխիդեաների և պտերների բացառիկ հազվագյուտ (հնարավոր է՝ եզակի) տեսակներ։

Մաչու-Պիկչուի հնագիտական պարկի տնօրեն Ֆերնանդու Աստետե Վիկտորիան հայտնում է, որ պարկի տնօրենությունը փորձում է ստանալ ճանապարհը բուսականությունից ազատելու թույլտվություն, ինչից հետո կձևավորվի հետազոտությունների ծրագիր։ Բացել ճանապարհը զբոսաշրջիկների համար մոտ ժամանակներս չի պլանավորվում։

Վերջերս հնագույն ճանապարհի նմանատիպ մի հատված էր հայտնաբերվել Հունաստանի Թեսալոնիկի քաղաքում, որի կենտրոնական ճանապարհներից մեկի տակ՝ 7 մետև խորության վրա, հայտնաբերվել էր հին հռոմեական ուղու մի հատված՝ կառուցված 1800 տարի առաջ։ Վերջինս կառուցվել էր դրանից 500 տարով ավելին հին՝ հունական ճանապարհի վրա։