Մարսի ձմեռային տեսարանները՝ Opportunity մարսագնացից

Ամերիկյան տիեզերական NASA ընկերությունը հրապարակել է Opportunity մարսագնացի կողմից ձմեռային կայանման ընթացքում նկարահանված պատկերների շարքը, որոնք բարձր որակով կարելի է դիտել NASA-ի պաշտոնական կայքում։

Համայնապատկերը կազմված է մարսագնացի կողմից 2011 թվականի դեկտերմբերի 8-ից մինչև 2012-ի մայիսի 8-ն արված կեղծգունային 817 լուսանկարներից, որոնք շեշտում են լանդշաֆտի երկրաբանական բազմազանությունը։

Լուսանկարման ընթացքում մարսագնացը գտնվել է Ինդեվոր (Endeavor) խառնարանի եզրի հրվանդանին։ NASA-ի անդամները ոչ ֆորմալ կերպով այն կոչել են Գրիլիի կայանատեղ (Greeley Haven)՝ ի պատիվ Արիզոնայի համալսարանից իրենց աշխատակցի՝ Ռոնալդ Գրիլի (1939-2011)։

Պատկերում երևում են մարսագնացի հատվածը՝ արեգակնային մարտկոցներով, դրա հետքերը, իսկ աջից հեռվում՝ 22 կիլոմետրանոց խառնարանի ներքին մասը։ Համայնապատկերի կենտրոնական հատվածն ուղղված է հյուսիս՝ աջ և ձախ ծայրերը՝ հարավ։

Opportunity մարսագնացը Կարմիր մոլորակի մակերևույթին է իջեցվել 2004 թվականին։ 2012 թվականի հուլիսի 2-ին լրացել է մոլորակի վրա սարքի աշխատանքի 3000 օրը։ Դրա հետ միասին ուղարկված Spirit նմանատիպ սարքը, 2009 թվականին խրվելով ավազունտերում, խզել է ազդանշանը և կորել։

Այժմ դեպի Մարս է թռչում մարսագնացներից ամենախոշորը՝ Մարսյան գիտական կայանը՝ Curiosity-ն («Հետաքրքրություն»), որի վայրէջքը նախատեսված է 2012-ի օգոստոսին։ Սարքի մեկնարկից անմիջապես հետո NASA-ն հրապարակել է դրա հորատողի հնարավոր խնդիրների մասին։