Հեղափոխությունը մնաց կես ճամփին. մարզպետը փոշմանել է

Վերլուծական 15 Մարտ, 2019 19:00

Վայոց ձորի 29-ամյա ՔՊ-ական մարզպետ Տրդատ Սարգսյանն ունի ընդամենը երկու տարվա աշխատանքային փորձ: Ըստ մամուլում տարածված տեղեկությունների` Տրդատ Սարգսյանին Վայոց ձորի մարզպետի պաշտոնում նշանակել են Հանրային ռադիոյի շենքի վրա հարձակվելու համար: Սակայն մի կողմ թողնենք այն արժանիքները, որոնց համար Սարգսյանը ստացել է իր պաշտոնը, շատ ավելի կարևոր է, թե ինչպես է մարզպետը իրեն դրսևորել զբաղեցրած պաշտոնում անցած ամիսների ընթացքում: Նշանակվելուց հետո Սարգսյանը հայտարարեց, որ վարչապետից ցուցում ունի՝ ստեղծել պայմաններ ներդրումային ծրագրերի իրականացման համար եւ հոգ տանել բնակիչների մասին, բարեկեցությունն ապահովել, լսել խնդիրները եւ փորձել քայլ առ քայլ լուծել դրանք։ Մի բան էլ սրտնեղել էր, որ հեղափոխությունը դեռ մարզ չի հասել և այդ բարդ առաքելությունն էլ դրված է իր ուսերին: Փորձենք, այնուամենայնիվ, հասկանալ՝ հաջողե՞ց մարզպետը մարզը հեղափոխականացնելու հարցում, թե ՝ ոչ…

Թերևս մարզպետի ամենահիշվող քայլը այս ամիսների ընթացքում ՝ իր խորհրդականին, գլխավոր քարտուղարին, վարչությունների մի շարք պետերին, քարտուղարության պետին, ներքին աուդիտի բաժնի պետին, գլխավոր մասնագետներին դրամական պարգևներ տալն էր որը, ընհանուր առմամբ, կազմել է 1 մլն 321 հազար 405 ՀՀ դրամ:

Սարգսյանը հայտնել էր, որ մարզպետարանում աուդիտ են իրականացնում՝ պարզելու համար նախորդների կերածի չափը: Աուդիտի մեկնարկից անցել է գրեթե կես տարի, սակայն դեռևս ականատես չենք լինում ցնցող կոռուպցիոն բացահայտումների: Մարզպետարա՞նն է վատ աշխատում, թե՞ թալանի մակարդակներն էին ուռճացված ներկայացնում հանրությանը:

Իսկ միգուցե մարզպետի հեղափոխական փոփոխությունը ենթադրում էր Ամուլսարը կոլապսի ենթարկելը կամ Ջերմուկի ավագանու նկատմամբ ճնշում բանեցնելը՝ կառավարության համար ցանկալի որոշում կորզելու նպատակով:

Ո՞ւր են ներդրումային համաժողովները, ստեղծված աշխատատեղերը, բարեկարգված ճանապարհները: Մինչդեռ կես տարին բավական երկար ժամանակ էր՝ հեղափոխությունը Վայոց Ձոր հասցնելու համար…