Հնդիկներին արգելել են սիրով ամուսնանալ

Բավականին տարօրինակ օրենք է ընդունվել Հնդկաստանի Ասարա գյուղում: Նրանք արգելել են գյուղի բնակիչներին սիրով ամուսնանալ: Ըստ տեղական իշխանությունների, ռոմանտիկ դրդապատճառներց ելնելով՝ ամուսնանալը խայտառակություն է: Նման արարքի համար զույգը կարող է արտաքսվել գյուղից ընդմիշտ, հաղորդում է BBC-ն:

Եվրոպացու համար նման անհեթեթ օրենքի ընդունումը, հավանաբար, պայմանավորված է նրանով, որ Ասարա գյուղի զգալի մասը, որը գտնվում է Դելիից ընդամենը 40 կմ հեռավորության վրա, արմատական մահմեդականներ են: Ինչպես հայտնել է նախաձեռնության հեղինակներից մեկը, նման ամուսնական կապերը վարկաբեկում են երիտասարդներին, հատկապես՝ աղջիկներին, որոնք «խայտառակում են ամբողջ ընտանիքը»:

Հնդկական գյուղերում ավագները հաճախ են կայացնում երկրի օրենսդրությանը հակասող որոշումներ: Չնայած այն հանգամանքին, որ նրանց կողմից ընդունված որոշումները սահմանադրական ուժ չունեն, փոքր գյուղերի բնակիչներն անվերապահորեն հետևում են դրանց, նույնիսկ այն դեպքերում, երբ խոսքը սպանության մասին է: Հայտնի են դեպքեր, երբ ավագները մահվան են դատապարտել այս կամ այն աղջկան անբարոյական պահվածքի համար:

Ինչ վերաբերում է Ասարա գյուղին, ապա այստեղ ավագները արգելել են մինչև 40 տարեկան կանանց օգտվել բջջային հեռախոսներից և դուրս գալ փողոց առանց տղամարդու կամ ծնողների ուղեկցության: Եվ այս ամենը՝ բացառապես գեղեցիկ սեռի ներկայացուցիչների անվտանգության նկատառումներով, նշում են գյուղի ավագանու ներկայացուցիչները:

Այնուամենայնիվ, Հնդկաստանի իշխանությունները հոգատարության նման դրսևորումները չեն խրախուսում: