Ովքե՞ր և ինչո՞ւ են «մաքրում» Սերժ Սարգսյանին Մարտի 1-ի գործից

Վերլուծական 19 Մարտ, 2019 18:00

Հայաստանյան լրատվամիջոցներից մեկը մարտի 16-ի համարի առաջին էջում տպագրել էր Հայաստանի երրորդ նախագահ, 2008-ին ՀՀ պաշտպանության նախարարի պաշտոնը զբաղեցրած Սերժ Սարգսյանի ցուցմունքից հատվածներ 2008-ի մարտյան իրադարձությունների վերաբերյալ: Դրանից հետո Հատուկ քննչական ծառայությունը (ՀՔԾ) հաղորդում է ներկայացնել նախաքննության տվյալները հրապարակելու դեպքի առթիվ քրեական գործ հարուցելու մասին: Ուշագրավն այս պարագայում այն է, թե ինչպես է ընդհանրապես նախաքննության տվյալները հայտնվել ԶԼՄ-ի ձեռքում:

Իրականում տարբերակներն այնքան էլ շատ չեն, սակայն դրանցից ոչ մեկն էլ չի բխում իշխանությունների շահերից: Առաջին տարբերակն այն է, որ ուժային համակարգի բուրգի ստորին հատվածը դեռևս շարունակում է աշխատել նախկին իշխանությունների համար, և վերևների փոփոխությունը իրականում Փաշինյանին շատ քիչ դիվիդենտ է բերել: Եթե այս տարբերակն է, ապա Փաշինյանը լուրջ մտածելու կարիք ունի, քանի որ նրա թիկունքում Սերժ Սարգսյանին «մաքրում» են Մարտի 1-ի գործից: Հարցաքննության դրվագների հրապարակումը ապացուցում է երկու փաստ՝ Սարգսյանը իր իսկ խոսքերով որևէ առընչություն չունի մարտիմեկյան ողբերգության հետ, երկրորդը՝ նա պահում է իր դեմքը՝ չմատնելով մյուսներին:

Կա նաև երկրորդ տարբերակը, որ արտահոսքը բնավ էլ պատահական չէր, և դա արվել է հենց իշխանական «կանալներով», միևնույն ժամանակ՝ նպատակը նույնն է՝ «մաքրել» Սերժ Սարգսյանին: Հետաքրքիր իրավիճակ է ստեղծվում, Սարգսյանի եղբայրը՝ Ալեքսանդր Սարգսյանը տարօրինակ պայմաններում, համապատասխան մարմիններին թույլտվություն ստանալով հեռացավ երկրից, միանալով հետախուզման մեջ գտնվող որդուն: Կան օբյեկտիվ մտահոգություններ, որ Ալեքսանդր Սարգսյանին մենք Հայաստանում այլևս չենք տեսնի: Այժմ էլ ակնհայտ փորձում են «մաքրել» Սերժ Սարգսյանին: Հարց է առաջանում, ինչո՞ւ…Մի բան ակնհայտ է. այս դեպքում թիրախում մնում է միայն երկրորդ նախագահ Ռոբերտ Քոչարյանը, իսկ այդ կոնֆիգուրացիան միանգամայն բխում է Սարգսյանի շահերից...