ՀԱԷԿ-ում իրականացվող որևէ փոփոխություն ընկերության գործունեության վրա անդրադառնալ չի կարող

«ՀԱԷԿ» ՓԲԸ-ում 2003թ-ին միջուկային վառելիքի գծով ռուսական մատակարարների հանդեպ կուտակվել էին շուրջ 40,0 մլն ԱՄՆ դոլար գումարի պարտքեր, որոնք օգտագործվել էին կայանում էլեկտրաէներգիայի արտադրության համար 1995-2001 թվականների ընթացքում:

Նոր վառելիքի մատակարարման վերսկսման համար նախապայման էր դրվել այդ պարտքերի մարումը: Երկարատև բանակցությունները բերեցին նրան, որ կազմվեց պարտքերի մարման ժամանակացույց, և որպես պարտավորությունների մարման երաշխիք ռուսական կողմը պահանջեց «ՀԱԷԿ» ՓԲԸ-ի ֆինանսական հոսքերի նկատմամբ իր կողմից վերահսկողության իրականացումը:

Արդյունքում ընդունվեց որոշում՝ «ՀԱԷԿ» ՓԲԸ-ի բաժնետոմսերով հավաստված իրավունքները հավատարմագրային կառավարման հանձնել «ԻՆՏԵՌ ՌԱՕ ԵԷՍ» ԲԲԸ-ին: Դա թույլ տվեց «ԻՆՏԵՌ ՌԱՕ ԵԷՍ» ԲԲԸ-ին վճարել «ՀԱԷԿ» ՓԲԸ-ի պարտքերը «ՏՎԵԼ» կոնցեռնի հանդեպ, և հետագայում հետ ստանալ իր վճարած գումարները «ՀԱԷԿ» ՓԲԸ-ից:

«ԻՆՏԵՌ ՌԱՕ ԵԷՍ» ԲԲԸ-ն անցած տարիների ընթացքում իրականացնելով հավատարմագրային կառավարչի գործառույթները՝ վերահսկում էր ընկերության բյուջեի ձևավորման և կատարման գործընթացը: Հարկ է նշել, որ այդ մեխանիզմը թույլ տվեց առանց ժամանակացույցի խախտման ամբողջությամբ վճարել պարտքերը:

Հավատարմագրային կառավարիչը, այդ բոլոր տարիների ընթացքում, չմիջամտեց տեխնոլոգիական գործընթացներին՝ սահմանափակվելով ՀՀ կառավարության 2003թ. սեպտեմբերի 17-ի N1211-Ա և 2008թ. դեկտեմբերի 4-ի N1411-Ա որոշումներով իր առջև դրված հիմնական խնդիրներով, որոնք էին.

•         «ՀԱԷԿ» ՓԲԸ-ի միջուկային վառելիքի գծով պարտավորությունների մարումը,

•         2003-2004 թվականներին թարմ միջուկային վառելիքի մատակարարումների կազմակերպումը և ֆինանսավորման ապահովումը,

•         կայանի ֆինանսատնտեսական վիճակի կայունացումը և ընթացիկ վճարունակության ապահովումը:

«ԻՆՏԵՌ ՌԱՕ ԵԷՍ» ԲԲԸ-ն ամբողջությամբ կատարեց իր առջև դրված խնդիրները և դրսևորեց իրեն որպես հուսալի գործընկեր: Այդ պայմաններում հավատարմագրային կառավարման պայմանագրի շարունակումը մեծամասամբ կրում է ձևական բնույթ և դառնում է ավելորդ:

Այս ամենը համընկավ «ԻՆՏԵՌ ՌԱՕ ԵԷՍ» ԲԲԸ-ի ռազմավարական ծրագրերի փոփոխության հետ, վերջինս սկսեց ազատվել ոչ պրոֆիլային ակտիվներից, ինչպիսին հանդիսանում է նաև «ՀԱԷԿ» ՓԲԸ-ի բաժնետոմսերի հավատարմագրային կառավարումը:

«ՀԱԷԿ» ՓԲԸ-ի բաժնետոմսերով հավաստված իրավունքների հավատարմագրային կառավարման պայմանագրի դադարեցումը չի անդրադառնա ընկերության աշխատանքների վրա, քանի որ, պայմանագրի գործողության ընթացքում և դրանից հետո, «ՀԱԷԿ» ՓԲԸ-ի գործունեության կառավարումը փաստացի իրականացվում է ՀՀ էներգետիկայի և բնական պաշարների նախարարությունը: