Ոչինչ չանելու նուրբ արվեստը

Վերլուծական 20 Մարտ, 2019 17:28

Դեկտեմբերին Ավանի թաղապետ էր նշանակվել Արա Դանիելյանը, ով հայտնի է «խալ Արո» մանկանվամբ: Ինչպես «Իմ քայլի» շատ այլ ներկայացուցիչների, այնպես էլ Դանիելյանի կենսագրությունը սկսվում է Փաշինյանի նախաձեռնած շարժումից: Թե կոնկրետ շարժման ո՞ր պահից է սկսվել նորաթուխ կենսագրությունը կամ կոնկրետ որ կողմից է քայլել նա, հայտնի չէ: Մամուլում տեղեկատվություն էր տարածվել, որ Դանիելյանը մեքենաների «մատորներ» է հավաքում և հոսանքներ կարգավորում: Ասում են՝ երիտասարդը նաև ձեռքի հետ խողովակների գործ է անում: Մի խոսքով՝ կենցաղային լեզվով ասած՝ «դզող-փչող» է...

Դեկտեմբեր ամսին ստանձնելով պաշտոնը, Դանիելյանը միանգամից լծվեց Ավանի բազմաբյուր խնդիրները «դզել- փչելուն»: Ի դեպ, նա միայնակ չէր այդ գործում: Բանն այն է, որ Երևանի Ավան վարչական շրջանի ղեկավարի տեղակալ էր վերանշանակվել Սամվել Ղումաշյանը: Ղումաշյանը, հնարավոր է, շատերին ծանոթ չէ։ Սակայն համացանցում նա հիշատակվում է թավշյա հեղափոխության օրերին Ավանում մեքենաներ ջարդած և մարդկանց ծեծի ենթարկած խմբի մասին հրապարակումներում: Այս ամենը այնքան մեծ աղմուկ բարձրացրեց, որ տեղակալին հեռացրին, իսկ Դանիելյանը ստիպված էր հայտարարել, որ ինքը Ղումաշյանին ոչ նշանակել է, ոչ ազատել, դեռ մի բան էլ արդարացնելով վերջինիս, նշելով, որ նա ցուցարարներին ծեծի չի ենթարկել:

Իսկ ինչո՞վ է զբաղվել Դանիելյանը այս ամիսների ընթացքում: Թաղապետարանի ֆեյսբուքյան էջից տեղեկանում ենք, որ սույն կառույցի գլխավոր խնդիր-նպատակը Երևանի քաղաքապետարանի PR-ն է: Բանն այն է, որ թաղապետարանը, համեստորեն չներկայացնելով իր կատարած տիտանական աշխատանքի ծավալները, մշտապես համացանցում կիսվում է Հայկ Մարությանի որոշումներով: Ինչպես ասում են՝ PR-ի պակաս՝ քաղաքապետը չունի: Դանիելյանի ղեկավարած կառույցը որոշել է հարվածել նաև Գագիկ Սուրենյանի գործին՝ համապատասխան էջում ավանցիներին հրամցնելով եղանակի տեսությունը: Եթե Դանիելյանը մոտակա ամիսներին էլ չմտնի թաղապետի «դերի» մեջ, կարող ենք ակնկալել նաև նոր հաշվետվություններ, ի դեմս, օրինակ, տարադրամի փոխարժեքի կամ աստղագուշակի…