Սահմանների առումով մենք ոչինչ չունենք Ադրբեջանի նկատմամբ. Հովիկ Աղազարյան

Վերջին շրջանում ամենաքննարկվող թեման Արցախյան խնդիրը և դրա կարգավորման  ձևերն են: Հայաստանի իշխանությունները ցանկանում են, որ Արցախի Հանրապետությունը ներգրավվի բանակցություններին: Այս թեմայի շուրջ ԼՈՒՐԵՐ.com-ը զրուցել է Աժ «Իմ քայլը» խմբակցության պատգամավոր Հովիկ Աղազարյանի հետ, ով վերջերս բավական ռիսկային հայտարարություն էր արել՝ «Ինչքան շուտ պատերազմը սկսվի, էնքան լավ մեզ համար, էնքան վատ՝ իրենց համար»: 

-Պարո՛ն Աղազարյան, ձեր քաղաքական թիմին կհաջողվի՞ Արցախը ներգրավել բանակցային գոտի, ի՞նչ կտա այն Արցախին:

-Նախ, այդ քաղաքականությունը ճիշտ է և կարծում եմ՝ նաև իրատեսական է: Քանի որ ինքնանպատակ  չէր լինի: Այստեղ մենք շատ լուրջ հարցերի պատասխան ենք ստանում այդ իմաստով, որ եթե մենք մնում ենք նախկին ձևաչափի մեջ, ապա  միջազգային հանրության շրջանակներում արմատավորվում է այն հանգամանքը, որ մենք պետք է առաջնորդվենք սահմանների անձեռնմխելիության սկզբունքով: Հայաստանի և Ադրբեջանի միջև գոյություն ունի սահմանների խնդիր, այսինքն, քանի որ Ադրբեջանն է, այսպես կոչված, պահանջող կողմը, նշանակում է, որ մենք սահմանային հարցեր ենք ներկայացրել Ադրբեջանին և ինչ-որ տեղ «զավթել ենք»  որոշակի տարածքներ: Իսկ երբ Արցախն է մասնակցում այդ բանակցություններին, որը և ճիշտն է, հարցի քննարկումը տեղափոխվում է ազգերի ինքնորոշման սկզբունքի տիրույթ:  Սահմանների առումով  մենք ոչինչ չունենք Ադրբեջանի նկատմամբ: Ուղղակի մեր հայրենակիցները, որոնք ապրել են այդ պատմական հայրենիքում, ինքնորոշվել են: Աշխարհի բոլոր երկրները պետք է իմանան Արցախի Հանրապետության մասին և ճանաչեն այն: Այս բանակցություններում Արցախի մասնակցությունը կնպաստի դրան:

-Կարելի է ասել, որ Հայաստանը և Արցախը վարում են խաղաղասիրական  քաղաքականություն, իսկ Ադրբեջանը հակառակ պատասխան է տալիս: Ի՞նչ հետևանքներ կարող է ունենալ այս ամենը:

- Ցավոք սրտի, այդ քաղաքականությունները չեն համընկնում: Երբ Ադրբեջանն ասում է, որ պետք է Ղարաբաղի ադրբեջանական համայքն էլ մասնակցի բանակցություններին, այստեղ պատասխան կա: Նախ, որպես այդպիսին, նման համայնք գոյություն չունի: Նրանք մասնակցել են  Ադրբեջանի ընտրություններին, և այդ մասին ժողովրդին ներկայացնում է հենց նախագահը ՝ Իլհամ Ալիևը: Իսկ մեր վարչապետը, ով մասնակցում է բանակցություններին, ընտրված չէ Արցախի ժողովրդի կողմից: Լեգիտիմ իմաստով, չի կարող ներկայացնել արցախցիներին:

- Հայաստանը խաղաղասիրություն է ցուցաբերում նաև գերիների հարցում և պատրաստ է ադրբեջանցի գերուն վերադարձնել իր կամ երրորդ երկիր, իսկ Ադրբեջանը հայ բնակչին դատապարտել է 20 տարով: Որքանո՞վ է ճիշտ հայաստանյան կողմի քայլերը:

-Ե՛վ այդ քայլը, և՛ Արցախի մասնակցության հարցը այն բանալիներն են, որոնք պետք է հնարավորություն տան, որ  երկու երկրների ղեկավարները ճիշտ ուղով առաջ գնան: Մենք պետք է միշտ ցույց տանք, որ պատրաստ ենք հարցերը լուծել խաղաղ և մարդկային ձևով: Բայց, եթե պետք լինի՝ իրենց սպառնալիքներին պետք է պատասխանենք նույն կերպ: Ես այս քայլերը ճիշտ եմ համարում: Հայ երիտասարդին վերադարձնելու համար քայլեր ձեռնարկվում են, և ես կարծում եմ, որ մենք հաջողություն կունենանք:

- Այս օրերին Ադրբեջանը հզոր զորավորժություններ է իրականացնում և ունեցած զինտեխնիկան է ցուցադրում, պատրաստվում են պատերազմի՞:

- Մենք պատերազմի մեջ ենք, ուղղակի հիմա զինադադար է: Եթե մեր հակառակորդը վստահ լիներ, որ կարող է ուժով հաղթել մեզ, ապա նրանք անմիջապես գործողություններ կսկսեին: Չէին նայի ոչնչի: Հետևաբար, մենք, մի կողմից պետք է մտածենք խաղաղ ճանապարհով լուծում գտնելու մասին, մյուս կողմից՝ պատրաստ լինենք մարտական գործողությունների վերսկսմանը: Մեր ազգային միասնությունը միշտ պետք է ունենանք որպես հզոր զենք:  Մեր հակառակորդի համար դա զսպող զենք է:

Ասպրամ Փարսադանյան