120 լաբորատորիա` Հայաստանից Լիբանանին

ՀՀ ԿԳ նախարար Արմեն Աշոտյանը, ով երկօրյա պաշտոնական այցով գտնվում է Լիբանանում, հանդիպել է Լիբանանի իր պաշտոնակից Հասան Դիաբի հետ։ Դիաբն Աշոտյանին դիմավորել է օդանավակայանում՝ Լիբանանում ՀՀ արտակարգ և լիազոր դեսպան Աշոտ Քոչարյանի և «Փյունիկ» հիմնադրամի նախագահ Գաբրիել Չեմպերճյանի հետ։

Արմեն Աշոտյանը զրուցել է նաև «Ազդակ» օրաթերթի թղթակցի հետ՝ հայտնելով, որ իր այցելությունը բազմաթիվ նպատակներ ունի։

«Հայ-լիբանանյան երկկողմանի հարաբերություններն ավանդականորեն խարսխված են քաղաքակրթական նմանություններու վրա։ Կարևոր է, որ այդ հարաբերությունները գոյություն ունենան ոչ միայն քաղաքական, տնտեսական և մշակութային ոլորտներում, այլև խարսխվեն կրթական ծրագրերի վրա, որոնց շնորհիվ՝ կարելի կլինի ապահովել միջմշակութային երկխոսությունը և փոխադարձ օգտակարությունը՝ փոխանակելով ծրագրեր և կրթական բարեփոխումներ», - ասել է Արմեն Աշոտյանը:

Նա նաև նշել է, որ Հայաստանի և Լիբանանի ԿԳ նախարարությունների միջև երկար ժամանակ պաշտոնական հարաբերություններ գրեթե գոյություն չեն ունեցել, և հույս է հայտնել, որ ինքն ու Դիաբը կկարողանան այդ հարաբերություններին նոր շունչ հաղորդել։

Իր հերթին Դիաբն ասել է, որ Լիբանանի և Հայաստանի հարաբերությունները կրթական ոլորտում պիտի նոր թափ ստանան՝ հիմնվելով երկու նախարարությունների միջև նախապես ստորագրված համաձայնագրերի վրա։ Նա նաև հաստատել է, որ Աշոտյանի այցելությունն առիթ է լինելու, որպեսզի վերականգնվի երկու երկրների միջև կրթության տարբեր աստիճաններին, ինչպես նաև արաբերենի ուսուցմանը վերաբերող ծրագիրը։

Դիաբը դրական է համարել այն, որ Հայաստանի և Լիբանանի կրթական համակարգերը նման են։ Բացի այդ՝ նա հայտարարել է, որ պատրասվում է ուղեկցել Լիբանանի նախագահ Միշել Սուլեյմանին Հայաստան կատարելիք պաշտոնական այցի ընթացքում։

Այսօր Լիբանանի կրթության նախարարությունում տեղի է ունեցել աշխատանքային հանդիպում, որից հետո հայկական պատվիրակությունը, Լիբանանի կրթության նախարարության միջոցով, լիբանանյան պետական վարժարաններին է հանձնել Հայաստանի Հանրապետության կառավարության կողմից ուղարկված 120 լաբորատորիա: