Մի քիչ անարդարության զգացողություն կա մթնոլորտում

Արդեն տեղեկացրել էինք, որ նախագահ Արմեն Սարգսյանը Սահմանադրական դատարանի դատավորի թափուր հաստիքի համար առաջադրել է Գոռ Հովհաննիսյանի թեկնածությունը։ Հայտարարված մրցույթին մասնակցել են նաև իրավաբաններ Մարտին Մանուկյանը և Վահե Գրիգորյանը, վերջինիս նախագահը արդեն իսկ մեկ անգամ առաջադրել էր այդ պաշտոնին, սակայն հոկտեմբերի 23-ին տեղի ունեցած քվեարկության արդյունքներով չի ընտրվել, քանի որ քվեարկությանը 105 պատգամավորներից մասնակցել էր ընդամենը 54-ը, մինչդեռ ՍԴ անդամի ընտրության համար անհրաժեշտ էր 63 կողմ քվե:

Նկատենք, որ Գոռ Հովհաննիսյանի հետ մրցութային հարցազրույցը նախագահ Սարգսյանն անց է կացրել Skype-ի միջոցով, ապա ընտրել հենց իրեն:

ԼՈՒՐԵՐ․com-ի հետ զրույցում ԱԺ «Իմ քայլը» խմբակցության պատգամավոր, իրավաբան Նիկոլայ Բաղդասարյանը կարծիք հայտնեց, որ մի քիչ անարդարության զգացման երևույթ կա մթնոլորտում. «Ոչ թե արդեն արված ընտրությունն եմ համարում անարդար, այլ մի քիչ անարդարության զգացողություն կա մթնոլորտում։ Այստեղ խնդիրը ինստիտուցիոնալ է։ Խնդիրն այն է, որ նախկինում, երբ առաջադրվել էր Վահե Գրիգորյանի թեկնածությունը, ընդամենը քվորում չապահովվելու պատճառով նիստը հետաձգվեց։ Դա նշանակում է, որ պետք է թեկնածուն փոխվի՞։ 

Իրավական տեսակետից ոչ մի խնդիր չէր առաջանա, եթե կրկին առաջարկվեր Վահե Գրիգորյանը։ Այդ ժամանակ քվորում կլիներ, և նրան հնարավորություն կտրվեր»,- ասաց Բաղդասարյանը։

Պատգամավորը նշեց, որ անձամբ ճանաչում է Գոռ Հովհաննիսյանին և շեշտեց, որ խնդիրը բացարձակ անհատներին չի վերաբերվում։ Այս գործընթացում էլ պետք է որոշակի փոփոխություններ կատարվեն։

ԼՈՒՐԵՐ․com- հետ զրույցում իրավաբան, «Լուսավոր Հայաստան» կուսակցության պատգամավոր Տարոն Սիմոնյանն ասաց, որ նախագահը խորհրդատվական  հանձնաժողով էր ձևավորել։ Երեք թեկնածու է դիմել, և նախագահը ընտրել է նրանցից մեկին։

«Նախագահը անգամ պարտավոր չէր նման հանձնաժողով ձևավորել։ Սահմանադրությունը իրավունք է տալիս, որ նա առաջադրի թեկնածու։ Գոռ Հովհաննիսյանին անձամբ չեմ ճանաչում, միայն կարդում եմ նրա գրառումները, կենսագրական տվյալներին ծանոթ չեմ։  Բացասական և դրական շատ մեկնաբանություններ տալ չեմ կարող, դրականի մասով միայն գիտեմ, որ նա ունի խորը գիտական հետազոտություններ։ Անարադարության կամ արդարության հարց, կարծում եմ՝ չկա։ Որոշ իրավաբաններ մտավախություն էին հայտնել, որ մեկ մարդը չի կարող մի քանի անգամ առաջադրվել։ Սահմանադրության մեջ այս առումով կան որոշակի տարընթերցումներ։ Կարելի է ասել, որ սա նախագահի որոշումն է, նա անգամ կարող է չհետևել հանձնաժողովի եզրակացությանը»,- ասաց պատգամավորը։

Աժ-ը պատգամավորները շեշտում են, որ այս հարցում անհատների խնդիր չեն տեսնում։

Ասպրամ ՓԱՐՍԱԴԱՆՅԱՆ