Վարչապետը իր գրպանի՞ց է վճարելու այդ 1 միլիարդ դոլարը

Վերլուծական 28 Մարտ, 2019 18:00

Վարչապետ Նիկոլ Փաշինյանն Ազգային ժողովում հայտարարել է, որ Հայաստանը վախենալու որևէ բան չունի, թող «Լիդիան ընկերությունը դիմի միջազգային արբիտրաժային դատարան: «Եթե վախենալու բան կա, ապա պետք է վախենա հենց դիմողը»,-ասել է նա՝ պատասխանելով ԲՀԿ պատգամավոր Արթուր Գրիգորյանին, որը հետաքրքրվել է, թե այդ դեպքում ի՞նչ քայլերի կդիմի կառավարությունը: Դիմում է, թող դիմի, ասել է վարչապետը:

Այս ողջ պատմության մեջ իհարկե ամենատխուրը պատկան մարմինների և, մասնավորապես, վարչապետ Փաշինյանի թքած ունենալու քաղաքականությունն է, նման կարևորագույն խնդիրներին ցինիզմի հասնող հայտարարություններով պատասխանելն ու արձագանքելը: Իրականում՝ այո՛, վախենալու է, քանի որ արբիտրաժային դատարան դիմելու դեպքում «Լիդիան»-ն ունի հաղթելու լուրջ շանսեր. չէ՞ որ այս ընկերությունը Հայաստան էր եկել իր բիզնես շահով թելադրված, իսկ փոխարենը՝ մի քանի չինովնիկների՝ ժամանակին որոշում կայացնելու ունակության բացակայության պատճառով, այդ նույն բիզնեսում կրել է միլիոնների հասնող վնասներ, և իհարկե, միջագզային դատարանը պարտավորեցնելու է Հայաստանին՝ համապատասխան վճարում անել: Խոսքը նվազագույնը 1 միլիարդ դոլարի մասին է, արդյո՞ք մեր վարչապետը, ով անգամ իր տան լվացքի մեքենայի վարկը մինչ օրս չի փակել, իր գրպանից է մուծելու այս տուգանքը: Իհա՛րկե ոչ, դրա համար էլ Փաշինյանը կարող է հանգիստ հայտարարել՝ դիմում է, թող դիմի: Եվ ոչինչ, որ հետագայում, այդ 1 միլիարդի հասնող բացը պետական բյուջեում փակելու են հպարտ քաղաքացիներին «քերելով» և նրանց հարկային բեռն ավելացնելով:

Մի բանում Փաշինյանը ճիշտ է՝ վախենալ պետք չէ: Վախենալու համար արդեն ուշ է: Պարզապես «Լիդիան»-ի օրինակը լակմուսի թուղթ է, թե ինչպես է աշխատում վարչապետի թիմը: Մի քանի ամիս երկրի ամենախոշոր նեդրողներից մեկի աշխատանքը կաթվածահար է եղել կառավարչական որոշում չկայացնելու արդյունքում: Այլ հարցերում, քաղաքական որոշումներ՝ այս թիմը շատ օպերատիվ է ընդունում. Հետաքրքիր է, ինչո՞ւմն է գաղտնիքը…