Կադրային ձախողումների «գինը»

Այն, որ Նիկոլ Փաշինյանի կադրերը մարզերում չեն փայլում՝ ակնհայտ է, այն, որ ստորին և միջին օղակներում իշխանությունը դեռ ունի լուրջ խնդիրներ՝ նույնպես: Ասվածի վառ ապացույցն էլ Արմավիրի մարզպետի աշխատանքն է, իսկ ավելի ճիշտ կլինի ասել՝ դրա բուռն իմիտիացիան, որում Համբարձում Մաթևոսյանը վերջերս այնքան էլ չի հաջողում: Բանն այն է, որ Արմավիրի մարզը ՀՀ ամենազարգացած, ներդրումային տեսանկյունից ամենագրավիչ մարզերից մեկն է և նախորդ տարիներին բոլոր ցուցանիշներով եղել է առաջատար մարզերի թվում: Իհարկե, եթե մարզի նոր ղեկավարությունն էլ, ինչպես ասում են՝ պահեր նշաձողը, դեռ մի բան էլ ակտիվ ջանքեր թափեր եղածը ավելացնելու, զարգացնելու ուղղությամբ՝ շնորհակալ կլինեինք թե՛ նախկիններին, թե՛ ներկաներին, քանի որ ի վերջո հետապնդած նպատակը մեկն է՝ մեր երկրի համաչափ զարգացումը: Սակայն ակնհայտ է, որ Համբարձում Մաթևոսյանին հաջողվում է անել գրեթե անհնարինը՝ մսխել այն ռեսուրսները, որոնք մարզն ուներ մինչ իր մարզպետ դառնալը: Ինքը՝ Մաթևոսյանը, իհարկե այդ կարծիքին չէ. իր իսկ կողմից իրեն տրված ճոխ պարգևատրումները դրա վառ վկայությունն են: Շատ են աշխատել և լարված՝ այսպես է այդ քայլը բացատրել մարզպետը: Շատ աշխատելու ռեալ արդյունքները, սակայն, արմավիրցիները չեն տեսնում:

Փոխարենը տեսնում են անկարողություն՝ նոր աշխատատեղերի ստեղծման, աշխատավարձերի բարձրացման հարցում: Արմավիրի մարզպետը շատ է սիրում ձեռքը սեղանին խփել ու հայտարարել, որ որևէ հանցագործ համայնքապետի թույլ չի տալու պաշտոնավարել, սակայն չենք տեսել այս ընթացքում ոչ մի աղմկահարույց բացահայտում, ոչ մի սենսացիա: Կամ նախկինները իրականում այնքան էլ սարսափելի և կոռուպցիայի մեջ շաղախված չէին, ինչպես փորձում էին ներկայացնել նոր իշխանության ներկայացուցիչները, կամ էլ նրանք պարզապես ի զորու չեն անել նման բացահայտումներ, և մնում է միայն դատարկ պոպուլիզմը: Մարզպետարանի կայքից տեղեկանում ենք, որ այս ընթացքում մարզի ղեկավարությունը միայն երկու գործ է փայլուն կատարել, նույնիսկ՝ գերակատարել: Մեկը «Սանիթեք»-ի գործն է, մյուսն էլ՝ Կարեն Կարապետյանի «Մաքուր Հայաստանի» ժառանգությանը տեր կանգնելը: Անխնա ավլում ու կանաչապատում են, իսկ մինչ այդ՝ գործազրկության ճիրաններում հայտնված մարզի բնակիչներն այն աստիճան են կորցրել հույսները սեփական մարզպետից, որ անգամ ամենաչնչին գանգատի դեպքում ուղիղ կառավարության շենքի մոտ են գնում…