Առաջին ձախողված բոյկոտը

Այսօր առավատյան տեղեկություն տարածվեց, որ «Իմ քայլը» խմբակցության պատգամավորների մի մասը խմբակցության ղեկավար Լիլիթ Մակունցի հետ մեկնել են Արցախ, ինչի հետևանքով ԱԺ արտահերթ նիստի համար քվորումը չի ապահովվել։ Նիստում պետք է քննարկվեր Սահմանադրական դատարանի և ԱԺ կանոնակարգ օրենքի մասին փաթեթների փոփոխությունը, որպեսզի հնարավոր լիներ անխափան կազմակերպել ՍԴ անդամի թեկնածուի քվեարկության հարցը։ Հանրապետության նախագահը ՍԴ դատավորի թեկնածու է առաջադրել Գոռ Հովհաննիսյանին։ ՍԴ-ն այս օրենսդրական փոփոխության համար վերջնաժամկետ է սահմանել ապրիլի մեկը։

 

Ի դեպ, Գրիգորյանի բախտը կարծես թե չի բերում: Սահմանադրական դատարանի դատավորի նախորդ ընտրության հարցը քննարկվեց Ազգային ժողովի՝ հոկտեմբերի 23-ին գումարված հերթական նիստում։ Սակայն ՍԴ դատավորի թեկնածու Վահե Գրիգորյանը չընտրվեց, ավելի կոնկրետ՝ ՀՀԿ խմբակցության արդեն նախկին պատգամավորները չընտրեցին Գրիգորյանին․ քվեարկությանը մասնակցեց ընդամենը 53 պատգամավոր։ Վահե Գրիգորյանի օգտին քվեարկել էր 30 պատգամավոր, մինչդեռ անհրաժեշտ էր 63 քվե։ Այսօր նույն քայլին գնաց նաև «Իմ քայլը »խմբակցությունը, սակայն արդեն Սարգսյանի առաջադրած թեկնածուի հարցում, այն պարզ պատճառով, որ իշխանությունները ամեն գնով ցանկանում են ՍԴ-ում տեսնել հենց Վահե Գրիգորյանին: Այս քայլը կարելի է դիտարկել իբրև լատենտ բոյկոտ նախագահ Արմեն Սարգսյանի առաջարկած թեկնածուի դեմ: