Սիրիային տրված վերջնագրի ժամկետը լրացել է. Արաբական լիգան պատրաստվում է նոր սանկցիաներ կիրառել. «Al Jazeera»

Սիրիայի իշխանությունները չեն ընդունել Արաբական երկրների լիգայի պահանջները՝ միջազգային դիտորդական խմբեր Սիրիա ուղարկելու վերաբերյալ։ Չնայած վերջնաժամկետի ավարտին՝ Արաբական լիգան 12 օր ավելացրել էր Սիրիայի իշխանություններից կոնկրետ պատասխաններ ստանալու համար, սակայն պաշտոնական Դամասկոսը չի արձագանքել այդ քայլին։

Ուրբաթ Սիրիայում տեղի ունեցած հակակառավարական ցույցերի ժամանակ անվտանգության ուժերի կողմից զոհվել են ավելի քան 35 մարդ: Այսօր Կահիրեում հանդիպելու են Արաբական լիգայի անդամ երկրների ֆինանսների նախարարները՝ քննարկելու Սիրիայի դեմ տնտեսական պատժամիջոցներ կիրառելու հարցերը։ Սակայն դեռ Լիգայի ղեկավարները չեն մանրամասնում, թե բացի տնտեսական սանկցիաներից, ինչ տեսակ պատժամիջոցներ են կիրառվելու։ Միայն արդեն հայտնի է, որ արաբական աշխարհը պատրաստվում է սառեցնել Սիրիայի Կենտրոնական բանկի և այդ երկրի առևտրային բանկերի հաշիվները։ Չի բացառվում, որ նաև կդադարեցվեն Սիրիա կատարվող ավիաթռիչքները։ 

Երեկ, Թուրքիայի ԱԳ նախարար Ահմեդ Դավութօղլուն հայտարարել է, որ շարունակվող արյունահեղությունը կհանգեցնի Սիրիայի միջազգային մեկուսացմանը։ Նա կոչ է արել Սիրիայի նախագահ Բաշար Ասադին՝ անմիջապես ստորագրել Արաբական լիգայի պահանջների տակ, դադարեցնել բռնի ճնշումները ցուցարարների նկատմամբ և ընդունել միջազգային դիտորդական խմբերին։ 

ՄԱԿ-ի գլխավոր քարտուղար Պան Գի Մունը ողջունել է Արաբական լիգայի ջանքերը՝ Սիրիայում տիրող իրավիճակը կարգավորելու հարցում և առաջարկել է ՄԱԿ-ի աջակցությունը դիտորդական խմբերի ձևավորման հարցում։