ՋԸՕ պետերից ո՞ւմ տուն առաջինը կմտնեն իրավապահները

Վերլուծական 4 Ապրիլ, 2019 18:00

Ջրային ոլորտում երկար տարիներ ի վեր վխտացող կոռուպցիայի, տոտալ թալանի ու դե ֆակտո մենաշնորհային իրավիճակի մասին արդեն մի քանի ամիս է, ինչ ակտիվորեն ահազանգվում է ու խոսվում: Խնդիրները ոլորտում շատ են: Սակայն, կարմիր թելի պես, անցնում է կոռուպցիոն բարձր ռիսկայնությունը, որն առկա է այստեղ, և որի դեմ օրերս ԱԺ ամբիոնից պատերազմ հայտարարեց վարչապետ Փաշինյանը՝ սպառնալով «հատ-հատ մտնել ՋԸՕ պետերի տուն, ստուգել նրանց ունեցվածքը»: Գաղտնիք չէ, որ, օրինակ, նույն ՋՕԸ-ների տնօրենի պաշտոնը ոչ բարեխիղճ աշխատողների համար բավականին եկամտաբեր է և կարելի է այստեղ շատ հանգիստ՝ առանց մեծ աղմուկ հանելու, «ձեռքերը լավ տաքացնել»:

Գյուղացիներից ոմանք ՋՕԸ-ների պետերին նմանեցնում են տեղական «օլիգարխների» հետ, որոնք գյուղացուն հատկացված ջրի միջոցով լուծում են անձնական խնդիրները: Եթե ներկայիս իշխանություններն իրական ցանկություն ունեն պայքարել ջրային ոլորտում առկա խնդիրների, թալանի դեմ, ապա ճիշտ կլինի սկսել հենց ՋԸՕ-ի ռեֆորմից և այս ոլորտը լավ թափ տալուց: Օրինակ, ինչպե՞ս է ստացվում, որ Արագածոտնի ՋԸՕ-ի գործադիր տնօրենն այսօր, ըստ որոշ տեղեկությունների, 2009-ին «լեվի» ջուր գողանալու մեջ մեղադրվող և այդ հիմքով աշխատանքից ազատված Թելման Թովմասյանն է: Թե՞ այս պարագայում առաջնորդվել են այն հիմքով, որ «ջրի գողը գող չէ»:

Հասկանալի է, չէ՞, որ մարզի ամենաշահութաբեր ոլորտում նման «դեմք» դառնալու համար առնվազն անհրաժեշտ էր «թեթևակի» թաթախվել վարչապետի նշած կոռուպցիայի մեջ: Ընդ որում, այդ կոռուպցիայի մեջ ենթադրաբար թաթախված է ոչ միայն Աբրահամյանը, այլ նաև վերջինիս հետ խնամիական կապերի մեջ գտնվող՝ Էջմիածին ՋՕԸ ղեկավար Սուրեն Սեդրակյանն, ով, ըստ մամուլի հրապարակումների, նույնպես հասցրել է այս ընթացքում «աչքի ընկնել» իր կոռուպցիոն դրսևորումներով:

Ջրային օլիգարխիայի մյուս կարկառուն անդամն էլ Աշտարակ ՋԸՕ-ի պետ Արսեն Աբրահամյանն է, ով, որոշ տեղեկությունների համաձայն, ժամանակին աշխատելով «Վեոլիա Ջրում», ազատվել է աշխատանքից՝ կոռուպցիայի մեջ մեղադրվելով, սակայն առանց յուղոտ պատառի չի մնացել: Պարզապես զարմանալի է, որ Ջրային կոմիտեի աուդիտի բաժնի ստուգումները դեռ չեն հասել այս ՋԸՕ՝ այն պարզ պատճառով, որ Աշտարակի ոչ արտոնյալ ջրօգտագործողները ստիպված են վճարել չվճարման տոկոսներ, դրան գումարած՝ անօրինական պարտքերը, որոնք գրեթե յուրաքանչյուր սեզոնի գրվում են սովորական մահկանացու ջրօգտագործողների վրա՝ այն պարագայում, երբ չի կարելի բացառել արտոնյալ ջրօգտագործողների առկայությունը: Այն, որ Աշտարակում, հատկապես՝ ջրաօգտագործման ոլորտում, առկա են ահռելի խնդիրներ, ակնհայտ է: Ակնհայտ է նաև, որ պետությունից ստացված հազարավոր դրամներն էլ ծախսվել էլ են ոչ նպատակային, դա էլ է ակնհայտ: Հակառակ դեպքում, այդ խնդիրներն արդեն լուծված կլինեին:

Հարց է առաջանում՝ եթե կառավարությունը որոշել է գլխատել «ջրային մաֆիա» կոչվող վիշապին, ապա ո՞ւմ է սպասում և ինչո՞ւ են այս մարդիկ շարունակում իրենց սև գործը: Փաշինյանը խոստանում է «բանտերը լցնել» Հայաստանի համար ստրատեգիական նշանակություն ունեցող, համապատասխան ոլորտը թալանածներին, բնականոն զարգացումը սեփական գրպանային շահերի համար խաթարածներին: Կասկած չկա` նույն ԱԱԾ-ի համար որևիցե դժվարություն չի ներկայացնելու արժանահավատ փաստերի հավաքագրումն ու դրանք սեղանին դնելը: Մնում է սպասել և տեսնել, թե առաջինը ՋԸՕ պետերից ո՞ր մեկի տուն կմտնեն իրավապահները...