Սերժ Սարգսյանի «անտեսանելի» ձեռքը՝ Փաշինյանի կադրային քաղաքականությունում

Վերլուծական 4 Ապրիլ, 2019 19:00

Կառավարության այսօրվա նիստում որոշում է կայացվել Հանրային Խորհրդի նախագահի պաշտոնում վերանշանակել Վազգեն Մանուկյանին: Այս փաստը ուշագրավ է այնքանով, որ 2017 թվականին ինքը՝ Փաշինյանը ՀԽ-ն անվանել էր «Սերժ Սարգսյանի լեգիտիմության իմիտիացիայի համար ստեղծված կառույց», իսկ իրեն Մանուկյանին՝ «Սերժ Սարգսյանի մարդը»:

Վերլուծելով հետհեղափոխական Հայաստանում վարչապետ Նիկոլ Փաշինյանի կադրային որոշումները՝ տպավորություն է ստեղծվում, որ պետական «շինարարության» համար առանցքային գերատեսչությունները՝ ՊՆ, Ֆինանսների նախարարություն, ԱԳՆ, Ոստիկանություն, էներգետիկ ոլորտ՝ ի սկզբանե որոշված էր տալ «վետերաններին» կամ նախկին իշխանության մաս կազմող գործիչներին: Դատեք ինքներդ:

Էներգետիկ ենթակառուցվածքների ու բնական պաշարների նախարարը Փաշինյանի կաբինետում Գարեգին Բաղրամյանն է: Մինչեւ այս նախարարությունում աշխատանքի անցնելը՝ Բաղրամյանը 2003թ Հանրային ծառայությունները կարգավորող հանձնաժողովում էր աշխատում ու պարբերաբար հանդես գալիս հայտարարություններով, որ հնարավոր չէ նվազեցնել սակագները: Այժմ Փաշինյանի կառավարության առանցքային հարցերից մեկը սակագնային քաղաքականության վերանայումն է բոլոր խմբերի համար:

ԱԻ նախարարը նույնպես նախկին ՀՀԿ-ական Ֆելիքս Ցոլակյանն է: Ցոլակյանը ԱԱԾ կադր է, իր աշխատանքային կարիերան սկսել է որպես խորհրդային ՊԱԿ-ի սպա, 2007-2013թթ. զբաղեցրել է ԱԱԾ տնօրենի տեղակալի պաշտոնը: ՊՆ ներկայիս նախարարը Սերժ Սարգսյանի կաբինետում ԱԻ նախարար աշխատած Դավիթ Տոնոյանն է, Սյունիքի մարզպետը Սարգսյանի օրոք ՀՀ ոստիկանապետի տեղակալ աշխատած Հունան Պողոսյանը: Ֆինանսների նախարարի պաշտոնը ստանձնեց նախկին փոխնախարար Ատոմ Ջանջուղազյանը, ով նույնպես Սերժ Սարգսյանի կադրերից մեկն է: ՊԵԿ նախագահ Դավիթ Անանյանը ևս համակարգի հին գելերից է, ով նախկինում բարձր պաշտոններ է զբաղեցրել և նրան որևէ կերպ Փաշինյանի թիմակից չես անվանի: Երևանի փոխքաղաքապետի պաշտոնում վերանշանակվեց Կամո Արեյանը, և հաշվի առնելով Հայկ Մարությանի մենեջերական տաղանդը, այս պահին հենց Արեյանն է կուրացիա անում քաղաքապետարանի բոլոր գործերը: ԿԲ ղեկավարի պաշտոնում շարունակում է աշխատել Արթուր Ջավադյանը՝ ևս մեկ սարգսյանական կադր:

Եվ այս տենդենցը առկա է ոչ միայն առանցքային պաշտոնների դեպքում: ՊԵԿ մաքսանենգության դեմ պայքարի վարչության պետի տեղակալը, օրինակ, Ասատուր Սահակյանն է։ Վերջինս ՀՀԿ-ական է, 2017-ի ընտրություններին Կենտրոնում պայքարում էր պատգամավորության թեկնածու Նիկոլ Փաշինյանի դեմ։ Ի դեպ, Ասատրյանը նաև Ֆլեշի Բարսեղի փեսա Սամվել Սանամյանի «զինակիցն» է համարվում։ Կամ, օրինակ, ինչպե՞ս է ստացվում, որ Պետական վերահսկողական ծառայությունում վարչության պետի պաշտոն է ստանում 2017 թվականի խորհրդարանական ընտրություններում ռեյտինգային ընտրակարգով առաջադրված ՀՀԿ պատգամավորի թեկնածու Հայկ Պլուզյանը, ով նաեւ նույն համայնքում առաջադրված՝ այդ ժամանակ պատգամավորի թեկնածու Նիկոլ Փաշինյանի մրցակիցն էր: Պլուզյանը առ այսօր հանդիսանում է ՀՀԿ անդամ, եղել է հարկայինի նախկին աշխատակից եւ դժվար է պատկերացնել, թե ինչպես է ՀՀԿ-ական նախկին պաշտոնյան պայքարելու կոռուպցիայի դեմ: Փաստորեն, Փաշինյանի դեմ ժամանակին պայքարած անձինք այսօր նույն Փաշինյանի կառավարության օրոք պաշտոն են ստանում, կամ մեկ այլ օրինակ՝ ՀՀԿ-ական Էդգար Ղազարյանը, ով նշանակվել է ՀՀ Սահմանադրական դատարանի աշխատակազմի ղեկավար։ Նախկինում իրեն ու իր թիմին անպարտելի համարող ՀՀԿ-ական պաշտոնյան, պարզվում է, շատ արագ լեզու է գտել ներկայում իշխանության աթոռն զբաղեցնողի՝ Նիկոլ Փաշինյանի հետ։ Ուշագրավ է նաև այն, որ «Իմ քայլը» դաշինքի որոշ պաշտոնյաների շոկի է ենթարկել Ղազարյանի՝ պաշտոն ստանալը։

Իհարկե, այս նշանակումները միանշանակ խոսում են Փաշինյանի թիմում առկա կադրային ռեսուրսների պակասի մասին, սակայն միևնույն ժամանակ, այդ նույն կադրային քաղաքականությունից տպավորություն է ստեղծվում, որ Հայաստանում կադրային քաղաքականության մեջ ասողը դեռ Սերժ Սարգսյանն է...

Ստելլա Խաչատրյան