ZTE կորպորացիայի շահույթը մինչև տարեվերջ կնվազի 80%-ով

Հեռահաղորդակցման սարքավորումներ արտադրող չինական ZTE Corporation-ը հայտնել է մինչև տարեվերջ ընկերության շահույթը 80%-ով նվազելու մասին: Ընկերության ղեկավարությունը հայտնում է, որ շահույթի նվազումը կապված է ներդրողներին դիվիդենտներ տրամադրելու և չինական յուանի ու մնացած արժույթների հետ հարաբերակցությունների հետ:

Այս տարվա սկզբից ZTE ընկերության բաժնետոմսերի գները նվազել են 57%-ով: Ներդրողներին վստահություն չի ներշնչում նաև այն փաստը, որ անցած շաբաթ ԱՄՆ-ի Դաշնային հետախուզական բյուրոյի կողմից ZTE ընկերությունում ամերիկյան արգելված ապրանքների` Իրան տեղափոխման կասկածանքով հետաքննություն է սկսվել:

«Այս տարվա սկզբում ընկերությունը հույս ուներ ներքին շուկայում մեծ շահույթ ստանալ, քանի որ չինական բջջային օպերատորները ակտիվ կերպով ներդրումներ են կատարում հեռահաղորդակցման ոլորտում: Նաև ZTE ընկերությունը հույս ուներ մեծացնել հեռախոսների արտադրության ոլորտը», - ասում է Jefferies ընկերության հեռահաղորդակցման բաժնի վերլուծաբան Սինտիա Մենգը:

Նա նշում է նաև, որ ZTE ընկերությունը սկսել է տուժել իր կիրառած դամփինգային քաղաքականությունից, որի շնորհիվ ընկերությունը կարողացել էր շուկայից դուրս մղել մի քանի կազմակերպություններ: Ուշագրավ է այն փաստը, որ նախորդ շաբաթ մի քանի վարկային և ռեյտինգային գործակալություններ նվազեցրել են ZTE ընկերության վարկանիշը:

Համաձայն ընկերության հրապարակած տվյալների` 2012 թ.-ի առաջին կիսամյակում ընկերության շահույթը կազմել է 308 մլն. յուան` նախորդ տարվա նույն ժամանակաշրջանում ստացված 769.3 մլն. յուանի փոխարեն: Տվյալների հրապարակումից անմիջապես հետո ընկերության բաժնետոմսերի գներն իջել են 14%-ով: