Հեղափոխություն՝ հանուն գործազրկության. ի՞նչ ստեղծեց Փաշինյանը մեկ տարում

Վերլուծական 9 Ապրիլ, 2019 18:00

Հայաստանի Հանրապետության վարչապետ Նիկոլ Փաշինյանին այսօր զայրացրեց Նորագավիթի մաքսատան տարածքի ոչ մաքուր վիճակը: Նորագավիթի մաքսատանը շրջայցի ընթացքում ՀՀ վարչապետը խայտառակություն որակեց մաքսատան տարածքի աղտոտվածությունը: Մեկ այլ դիտողություն էլ Փաշինյանն արեց ՊԵԿ նախագահ Դավիթ Անանյանին՝ տեսնելով, որ Հայաստանի դրոշը գտնվում է աշխատասենյակի հատակին: Վարչապետը նաև պահանջեց բոլորին, ովքեր աշխատել են այդ սենյակում՝ ազատել աշխատանքից:

Վարչապետ Նիկոլ Փաշինյանի գրառումը` «Մի ասա թե ի՞նչ է արել կառավարությունը քեզ համար, այլ ասա, թե դու ի՞նչ ես արել քեզ համար», ոչ այլ ինչ էր, քան պատասխանատվությունից խուսափելու և նախկինում տված խոստումները դրժելու հերթական դեպքը։ Մինչ այդ վարչապետի պաշտոնում հայտնված մարդն ավելի կոշտ ուղերձ էր հղել իր «հպարտներին»՝ ասելով, որ «աղքատությունը մարդու գլխի մեջ է»։ Նշենք, որ այսօր Հայաստանում սոցիալ-տնեսական իրավիճակի շարունակական վատթարացում, համատարած աղքատություն ու գործազրկություն է տիրում: Երկրի քաղաքացիները չեն մոռացել Փաշինյանի կողմից տրվող բազմաթիվ խոստումները, թե վարչապետն իր կախարդական փայտիկով իրենց կյանքը կփոխի դեպի լավը, թե կբարձրացվեն թոշակներն ու աշխատավարձերը, նոր աշխատատեղեր կբացվեն: Հայաստանի վարչապետը մեղադրում է քաղաքացիներին աշխատելու ցանկության բացակայության մեջ: Սակայն, մինչ մարդկանց դրա մեջ մեղադրելը, կառավարությունը նախևառաջ պետք է ապահովի այն պայմանները, որոնք հնարավորություն կտան բիզնեսին ներդրումներ կատարել և ստեղծել նոր աշխատատեղեր: ԱՄՆ-ն1929 թվականի մեծ դեպրեսիան հաղթահարել է ճանապարհաշինական խոշոր ծրագրի շնորհիվ, որը ներդրումներ է ներգրավել եւ աշխատատեղեր ստեղծել: Գերմանիան նույնպես մինչեւ Երկրորդ համաշխարհային պատերազմը ներդրումներ է արել ճանապարհաշինության մեջ:

Որքան էլ Նիկոլ Փաշինյանը փորձի ամոթանք տալ չաշխատողներին, քանի դեռ իրական փողեր չեն ներդրվել աշխատատեղերի ստեղծման գործում, մարդիկ չեն աշխատելու: Իսկ այդ փողերը ներդրվո՞ւմ են: Որքա՞ն աշխատատեղ են ստեղծել անցնող մեկ տարվա ընթացքում վարչապետը և իր կառավարությունը: Մոտավոր հաշվարկներով, մեկ տարվա ընթացքում կառավարությունը ստեղծել է 1500-2500 աշխատատեղ, մնացածը՝ հիպոթետիկ և խոստումների դաշտից, ասել է թե՝ այսինչ ծրագրերը եթե իրականություն դառնան, ապա կունենանք այսքան նոր աշխատատեղ: Իսկ քանի՞ աշխատատեղ է քանդել այս մեկ տարվա ընթացքում Փաշինյանը՝ Լիդիան, Թեղուտ, Ալավերդու պղնձաձուլարան, Սպայկա, պետական ապարատի շուրջ 10 հազար կրճատումներ: Եվ սա դեռևս ամբողջական ցուցակը չէ, քանի որ ըստ երևույթին իրեն ֆիզկուլտուրայի ուսուցչի տեղ դրած՝ զգաստ կանգնել պահանջող, իրեն Հայաստանի թիվ մեկ բնապահպանի տեղ դրած՝ բիչոկներ հավաքող վարչապետն այսքանով չի պատրաստվում կանգ առնել: Իսկ շատերը թյուրիմացաբար ենթադրել են, որ հեղափոխությունը արվում է նոր աշխատատեղեր ստեղծելու, այլ ոչ թե եղածն էլ քանդելու համար…