Ռուբինյանի «սյուրպրիզը» Նիկոլ Փաշինյանին

Վերլուծական 9 Ապրիլ, 2019 19:00

Եվրոպայի խորհրդի Մարդու իրավունքների հանձնակատար Դունյա Միյատովիչը Եվրոպայի խորհրդի խորհրդարանական վեհաժողովին է ներկայացրել իր առաջին տարեկան զեկույցը, որն ընդգրկում է Եվրոպայի խորհրդի անդամ պետություններում մարդու իրավունքների ամենատարածված խնդիրները։ Հայաստանին խորհուրդ է տրվում արագ ընդունել խտրականության դեմ պայքարի օրենք, որը ներառում է նաև սեռական կողմնորոշման ու գենդերային ինքնության հիմքով խտրականությունը։

Միյատովիչը նաև կոչ է անում խորհրդարանականներին՝ միանշանակորեն մերժել ցանկացած օրենսդրական առաջարկությունից, որ կարող է խախտել ԼԳԲՏ-ի անձանց իրավունքները կամ առաջացնել հակա-ԼԳԲՏ տրամադրություններ: 2019թ․-ի զեկույցում, անդրադառնալով մարդու իրավունքների նախորդ խախտումների համար հաշվետվողականությանը, հանձնակատարը ողջունել է քայլերը՝ պատասխանատվություն սահմանել 2008 թվականի մարտին տեղի ունեցած բռնությունների ժամանակ 10 մարդու մահվան համար, սակայն կարևորել, որ գործընթացն իրականացվի օրենքի գերակայության, դատական անկախության և անմեղության կանխավարկածի լիարժեք հարգմամբ։

Ի վերջո, հանձնակատարը կոչ է արել ՀՀ բոլոր քաղաքական գործիչներին և կարծիքների առաջնորդներին՝ հատուկ խնամք ցուցաբերել ու խուսափել բևեռացնող, խեղաթյուրող կամ բորբոքող խոսքից իրենց հանրային ելույթներում: Մեզ հավաստիացնում էին, որ այս զեկույցը արտացոլելու է Հայաստանում տեղի ունեցած դրական փոփոխությունները: Մինչդեռ Հայաստանի նոր իշխանություններին ոչ միայն մեղադրում են վերը նշված մեղքերի մեջ, այլ մի բան էլ խորհուրդ են տալիս պաշտպանել սեռական փոքրամասնությունների շահերը: Համենայն դեպս, անել ամեն ինչ, որպեսզի վերջիններիս շահերը, իրավունքները որևէ կերպ չոտնահարվեն: Այսօր դա արվում է խորհրդի կարգով, վաղը՝ պահանջի: Ստացվում է՝ կամ Ռուբեն Ռուբինյանի դիլետանտիզմը թույլ չի տվել կանխել նման խորհուրդների՝ օրակարգում հայտնվելը, կամ էլ այդ խորհուրդները ամբողջությամբ նոր իշխանությունների սրտով են: Հետաքրքիր է միայն, թե ինչպես է Փաշինյանը հանրապետականներին գեյ-ակտիվիստ անվանելու, եթե վերոնշյալ խմբին պաշտպանող օրենքը ընդունվի իր ղեկավարման շրջանում…