Հայաստան-Ճապոնիա. միմյանցից սովորելու շատ բան կա

Հուլիսի 17-ին ՀՀ ԱԻ նախարար Արմեն Երիցյանն ընդունել է Ճապոնիայի ճարտարապետների պատվիրակությանը՝ տեխնիկական գիտությունների դոկտոր, պրոֆեսոր Մոտոսակա Մասատոյի գլխավորությամբ:

Պատվիրակության Հայաստան այցի նպատակն է Ա. Թամանյանի անվան թանգարան-ինստիտուտում «Ինչպես ճապոնացի ճարտարապետները հաղթահարեցին 2011 թ. մարտի 11-ին Ճապոնիայում տեղի ունեցած երկրաշարժի հետևանքները» խորագրով ցուցահանդեսի բացումը, ինչպես նաև տարբեր մարմինների հետ քննարկումները' աղետների կառավարման հետ առնչվող մի շարք հարցերի վերաբերյալ:

ԱԻ նախարար Ա. Երիցյանը, ողջունելով Ճապոնիայից ժամանած հյուրերին, մասնավորապես ասաց.

- ՀՀ արտակարգ իրավիճակների նախարարության և Ճապոնիայի միջև համագործակցությունը հիմնվում է Ճապոնիայի և ՀՀ կառավարությունների միջև 2005 թ. ստորագրված «Տեխնիկական համագործակցության մասին» համաձայնագրի վրա: Նախարարությունը Ճապոնիայի միջազգային համագործակցության գործակալության (JICA) հետ տարբեր ծրագրեր է իրականացնում սկսած 2007 թվականից, որի շրջանակներում 2010 թ. ԱԻՆ փրկարար ծառայությանը տրամադրվել է 28 հրշեջ-ավտոմեքենա: Լուրջ համագործակցություն է ծավալվել սեյսմիկ պաշտպանության և ուսուցման ոլորտներում, որի շնորհիվ մեր աշխատակիցները վերապատրաստվում են Ճապոնիայում:

Այս տարվա հունիսին ՀՀ Նախագահ Սերժ Սարգսյանի' Ճապոնիա կատարած պաշտոնական այցի շրջանակներում ՀՀ ԱԻ նախարարությունը ներկայացրել է առաջարկություններ՝ Ճապոնիայի հետ հնարավոր համագործակցության ուղղությամբ: 2012թ. հուլիսի 3-4-ը Ճապոնիայի կառավարության հրավերով ՀՀ ԱԻ նախարարն այցելեց Տոհոկու նահանգ՝ մասնակցելու Աղետների նվազեցմանն ուղղված համաշխարհային նախարարական կոնֆերանսին:

Այնպես որ, մենք կարող ենք փաստել, որ մեր համագործակցությունը բարձր մակարդակի վրա է դրված:

Պատվիրակության ղեկավար, պրոֆեսոր Մոտոսակա Մասատոն իր ողջույնի խոսքում նշեց.

- 2011 թ. աղետալի երկրաշարժի, ցունամիի և ատոմային աղետի հետևանքով 20 հազար մարդ զոհվեց: Այդ իրադարձությունների ժամանակ մենք կարողացանք բացահայտել մեր բացթողումները և դասեր քաղել կատարվածից: Հիմնական թերություններն էին' շենքերի սեյսմակայության գնահատումը, ցունամիի դեպքում մարդկանց տարհանման ուսուցումը և ատոմակայանի խնդիրները: Դա մեր հիմնական խնդիրն է' թույլ կողմերի բացահայտումն ու ուժեղացումը: Այդ ամենը լավագույնս կարելի է անել համագործակցության միջոցով' թե տեղական, թե միջազգային մակարդակով: Մենք հուսով ենք, որ մեր փորձն օգտակար կլինի ձեզ:

ԱԻ նախարարը պատրաստակամություն հայտնեց կիսվել մեր ունեցած փորձով ու տեղեկատվությամբ' նշելով, որ աղետները երբեք չեն հարցնում արդյոք երկիր հարուստ է, թե՞ աղքատ, մեծ կամ փոքր:

Հանդիպման ընթացքում կողմերը նշեցին, որ միմյանցից սովորելու շատ բան կա, և մեր երկրների միջև համագործակցությունը լինելու է ամուր ու շարունակական:

Այցելության ավարտին ճապոնական պատվիրակության անդամները եղան նաև ԱԻՆ ճգնաժամային կառավարման կենտրոնում, ծանոթացան դրա տեխնիկական հագեցվածությանն ու հնարավորություններին: