«Զվարթնոց» արգելոց-թանգարանի տարածքում հիմնել են միջազգային կամավորական ճամբար

2011 թվականին ՀՀ մշակույթի նախարարության Պատմամշակութային արգելոց-թանգարանների և պատմական միջավայրի պահպանության ծառայությունը Հայաստանի ուսանողական ջոկատների հանրապետական շտաբ էր ներկայացրել աշխատանքների միջազգային կամավորական ճամբար բացելու ծրագիրը: Ծրագիրն արժանացել է ՅՈՒՆԵՍԿՕ-ի միջազգային կամավորական ծառայության կոմիտեի (CCIVS) բարձր գնահատականին: Այս ուղղությամբ ՅՈՒՆԵՍԿՕ-ի «Պատրիմոնիտո» ծրագրի մասնակից՝ Հայաստանի ուսանողական ջոկատների հանրապետական շտաբի և Պատմամշակութային արգելոց-թանգարանների և պատմական միջավայրի պահպանության ծառայության միջև ձեռք է բերվել երկկողմ պայմանավորվածություն՝ ս. թ. հուլիսի 6-ից 20-ը «Զվարթնոց» պատմամշակութային արգելոց-թանգարանի տարածքում հիմնել ճամբար-կայանատեղի: Ծրագրին մասնակցում են 15 կամավոր՝ 5-ը Հայաստանից, 4-ը Իսպանիայից, 3-ը Ֆրանսիայից, 1-ական մասնակից Չեխիայից, Մեծ Բրիտանիայից, Հնդկաստանից: Ճամբարի կամավորները 15 օր շարունակ կմասնակցեն տարածքի բարեկարգման աշխատանքներին և Պատմամշակութային արգելոց-թանգարանների և պատմական միջավայրի պահպանության ծառայության կողմից կազմակերպված կրթամշակութային 3 ծրագրի: Մեկնարկած «Ազգային հնչյունները Զվարթնոցում» խորագրով ծրագրի շրջանակում Հայաստանի ուսանողական ջոկատների հանրապետական շտաբ-կամավորական աշխատանքների ծառայության շահառուները ծանոթացել են հայկական ազգագրական երգ ու պարին: Ծրագիրը կրում է ինտերակտիվ բնույթ և բաղկացած է երգի, պարի ուսուցման փուլերից: «Պատրիմոնո- 2012. իմ տպավորությունները» խորագրով ծրագիրը սլայդ-շնորհանդեսի պատրաստում է՝ մասնակիցների կարծիքները, տպավորություններն ամբողջացնելու և կատարած աշխատանքները լուսաբանելու համար: Ծրագրի ավարտին կամավորները կներկայացնեն լուսանկարներ, տեսանյութեր, ուշագրավ պատմությունների գրառումներ: «Խոսենք մեր պետությունների խորհրդանշանների լեզվով» խորագիրը կրող միջոցառման շրջանակում արգելոց-թանգարանի մուտքի մոտ կտեղադրվի 2 պաստառ՝ աշխարհի տարբեր լեզուներով «ԲԱՐԵՎ» բառով և հայերեն լեզվով մասնակից երկրների պետական խորհրդանշանների մասին տեղեկատվությունով: Միջոցառման օրը թանգարանի նախասրահի ստենդերի վրա մասնակիցները կներկայացնեն իրենց պաստառները՝ տվյալ երկրի զինանշանի, ազգային դրոշի, հեղինակների, հայրենի երկրի անվան ծագման վերաբերյալ տեղեկատվություն, ինչպես նաև ՅՈՒՆԵՍԿՕ-ի Համաշխարհային ժառանգության ցանկում ընդգրկված համապատասխան երկրի նշանավոր պատմամշակութային հուշարձանները ներկայացնող լուսանկարներ: Պաստառների վրա դրվագներով կներկայացվեն նաև յուրաքանչյուր երկրի անվանի մշակութային գործիչների, պատմամշակութային և բնական հուշարձանների պատկերներ: