Օպերացիա «Դամասկոսի հրաբուխ»

Մարտերը Սիրիայի մայրաքաղաք Դամասկոսում ժամ առ ժամ թեժանում են: Այս պահին մարտական գործողությունները, բացի Դամսկոսի հարավային թաղամասերից, հասել են նաև քաղաքի արևելյան և նույնիսկ հյուսիս-արևելյան թաղամասեր:  Այդ մասին հաղորդում է France-Presse-ը՝ հավելելով, որ այսօր իշխանական զորքերը Դամասկոսի հյուսիս-արևելքում ուղղաթիռներ են օգտագործել:

Ապստամբների «Սիրիական ազատ բանակը» հայտարարել է, որ իրենք իրագործում են «Դամասկոսի հրաբուխ» օպերացիան, որի նպատակն է ազատագրել մայրաքաղաքը:

Ուղղաթիռները հրթիռակոծում և գնդացրային կրակ են բացում Քաբուն և Բարզեհ թաղամասերում դրիքավորված ապստամբների ուղղությամբ: Ընդդիմադիրները հայտնում են, որ իրենց հաջողվել է Քաբուն թաղամասում մեկ կառավարական ուղղաթիռ վերացնել:

Բացի այդ, առավոտյան գնդացիրների և մարտական տեխնիկայի կիրառմամբ դաժան մարտեր են տեղի ունեցել Սիրիայի մայրաքաղաքի առավել կենտրոնական մասում գտնվող Բաղդադի փողոցի վրա և Սաբաա-Բահարտ թաղամասում, ուր կան մի շարք կառավարական շինություններ: Այդ մասին հաղորդում է BBC-ն:

Շարունակվում են մարտերը հարավում գտնվող Միդան թաղամասում, որտեղ դեռ երեկվանից զրահատեխնիկա և ականանետներ են կիրառվում: Այսօր, համաձայն վկայությունների, Միդան և Խաջար ալ-Ասվադե թաղամասերը բազմիցս հրետանակոծվել են կառավարական զորքերի կողմից:

Բացի այդ, The Daily Telegraph-ի հաղորդմամբ՝ պաշտոնական Վաշինգտոնը մերժել է սիրիացի ընդդիմադիրների` իրենց զենք և ֆինանսավորում տրամադրելու խնդրանքը: Նշենք, որ վերջիններս խնդրել էին հազար նռնականետ, 500 թեթև հակաօդային միջոց, 750 գնդացիր և 6 միլիոն դոլլար տրամադրել:

2011 թվականի մարտից սկսած՝ երկրի նախագահ Բաշար ալ-Ասադի կողմնակիցների և ընդդիմադիրների բախումների ընթացքում զոհվածների քանակը շուրջ 17 հազար է: ՄԱԿ-ի տվյալներով՝ այս ընթացքում այլ երկրներում ապաստան ստացած սիրիացի փախստականների քանակը շուջ 112 հազար է: