Բակո Սահակյանի կոչն ընտրողներին

Արցախի Հանրապետության Նախագահի թեկնածու Բակո Սահակյանը կոչով դիմել է ընտրողներին.

«Արցախի թանկագին քաղաքացիներ, սիրելի ժողովուրդ,

Մենք գտնվում ենք մեր հանրապետության համար չափազանց կարեւոր մի իրադարձության՝ նախագահական ընտրությունների շեմին: Վստահ եմ, որ մեր ժողովուրդը պատվով կհաղթահարի այս փուլը եւս եւ մենք հաստատուն քայլ կանենք ժողովրդավարական Արցախի կառուցման, նրա անկախ պետականության կայացման ու ամրապնդման գործում: Դա մեծապես կախված է ձեզնից յուրաքանչյուրի ընտրությունից, մեր երկրի ու ժողովրդի ապագայի հանդեպ ունեցած պատասխանատվության զգացումից:

Արցախը ժամանակակից, զարգացած ու ճանաչված երկիր դարձնելը մեր գերագույն նպատակն է, որի իրականացման համար չափազանց կարեւոր է բոլորիս ջանքերի համախմբումն ու միասնաբար գործելու անհրաժեշտությունը:Մենք հաստատակամ ենք ու վճռական՝ ազատ, անկախ ու հզոր հայրենիք կերտելու գործում եւ պատրաստ ենք անել հնարավորը դրան հասնելու համար:

Դրա վկայությունը անցած հինգ տարիների մեր ժողովրդի ձեռքբերումներն են: Ընդհանուր առմամբ, մեզ հաջողվել է իրականացնել նախանշված ծրագրերը: Այդ մասին են խոսում 2007-2012թթ. սոցիալ-տնտեսական զարգացման մակրոտնտեսական ցուցանիշները: Նպատակասլաց աշխատանքի արդյունքում պահպանվել են խաղաղությունն ու կայունությունը, հզորացել է պաշտպանության բանակը՝ մեր ազատության ու անվտանգության հիմնական երաշխավորը, ամրապնդվել է Հայաստան-Արցախ-Սփյուռք եռամիասնությունը: Հաստատուն զարգացման փուլ է մտել տնտեսությունը, կառուցվել են բնակարաններ, դպրոցներ, հիվանդանոցներ, ճանապարհներ ու ջրատարներ, լուծվել են բազմաթիվ սոցիալական խնդիրներ:

Այս ամենին մենք կարողացել ենք հասնել մեր ողջ ժողովրդի քրտնաջան աշխատանքի շնորհիվ: Եվ եթե ինչ-որ բան մեզ չի հաջողվել անել այնպես, ինչպես-որ պետք էր, ապա դա ինձ էլ է մեծ ցավ պատճառում: Դրանում կան ինչպես օբյեկտիվ, այնպես էլ սուբյեկտիվ պատճառներ: Այսօր մենք ավելի լավ ենք տեսնում այդ բացթողումները, եւ վստահեցնում եմ, որ անպայման անհրաժեշտ միջոցներ կձեռնարկվեն առկա թերությունները վերացնելու ուղղությամբ:

Ես գնահատում եմ մեր ձեռքբերումները եւ կուզենայի, որ դրանք ունենան դրական աճի դինամիկա: Իմ նախընտրական ծրագրում նախանշված խնդիրները դժվարին են, բայց եւ միանգամայն իրատեսական: Այդ բոլոր խնդիրների արդյունավետ լուծումից է նաեւ մեծապես կախված մեր հանրապետության, մեր երկրի յուրաքանչյուր քաղաքացու եւ ամբողջ հասարակության բարեկեցությունը: Վստահ եմ, որ համատեղ ուժերով մենք կկարողանանք հաջողությամբ իրականացնել մեր համազգային նպատակներն ու ձգտումները եւ անպայման կարձանագրենք նոր հաղթանակներ: Եվ դա պետք է անենք ոչ թե ուրիշներին համոզելու կամ ինչ-որ բան ապացուցելու, այլ մեր քաղաքացիների, մեր ժողովրդի, մեր սերունդների համար

Ես ուզում եմ, որ միասին կառուցենք մի երկիր, որտեղ ապրելը պատիվ կլինի յուրաքանչյուր արցախցու համար, որտեղ կտիրի փոխադարձ հարգանքի մթնոլորտ, կպաշտպանվեն մարդու իրավունքներն ու արժանապատվությունը: Երկիր, որի մանուկները կլինեն ուրախ ու երջանիկ, ծերերը' անհոգ ու պաշտպանված, երիտասարդները՝ կիրթ ու զարգացած: Երկիր, որը կլինի ամեն մի հայի հպարտությունը:

Դա է մեր պայքարը իր վերջնական հանգրվանին հասցնելու գրավականը: Դա է պարտավորեցնում նաեւ մեր զոհված ընկերների, քույրերի ու եղբայրների հիշատակը, որը միշտ վառ պահելու լավագույն միջոցը ազատ, անկախ ու ծաղկուն Արցախ կառուցելն է: Արցախի անկախությունը եւ անվտանգությունը բացառիկ արժեքներ են եւ ենթակա չեն վերանայման: Մեզ համար չկա վերադարձ անցյալին' ինչպես սահմանների, այնպես էլ կարգավիճակի առումով:

Սիրելի հայրենակիցներ,

Այս նպատակները կյանքի կոչելու գործում ես ակնկալում եմ ձեր աջակցությունը: Ինձ համար թանկ է Արցախի Հանրապետության յուրաքանչյուր քաղաքացու վստահության քվեն՝ մեր երկիրը շենացնելու, մեր ժողովրդին անմնացորդ ծառայելու գործում: Ընտրությունը ձերն է:

Վստահ եմ, որ հուլիսի 19-ի նախագահական ընտրությունները եւս կանցնեն ժողովրդավարական նորմերին ու չափանիշներին համապատասխան եւ բոլորիդ ակտիվ մասնակցությամբ՝ որպես ապացույց մեր ժողովրդի բարձր քաղաքացիական կեցվածքի ու իմաստնության:

Կոչ եմ անում միասին շարունակել սկսածը՝ հանուն Արցախի, հանուն մեր ապագայի: