«Հրապարակ». Հմայակ Հովհաննիսյանից պահանջում են 7 միլիոն դրամ

Խորհրդարանական ընտրությունների ընթացքում Սյունիքի մարզպետ Սուրիկ Խաչատրյանի համագյուղացի Սենիկ Ջուլհակյանը երկու քաղաքացիական և մեկ քրեական հայց է ներկայացրել ընդդեմ Հմայակ Հովհաննիսյանի: Քաղաքացիական գործերից մեկն առնչվում է «Հայհիդրոէներգոնախագիծ» ինստիտուտի աշխատակից կանանց, որոնց, ըստ ներկայացված հայցի, վիրավորել էր Հմայակ Հովհաննիսյանը՝ ասելով. «Դուք նման եք Լֆիկ Սամոյի վարձած կանանց»: Հայցվորը Հմայակից պահանջում է երեք միլիոն դրամ:

Մյուս «գործով» Հմայակը վիրավորել է անձամբ Սենիկ Ջուլհակյանին' ասելով, որ նա խարդախություններով է զբաղվում: Այս գործի համար էլ հայցվորը պահանջում է երկու միլիոն դրամ: Գումարած մեկական միլիոն' փաստաբանական ծառայության համար: Ընդհանուր առմամբ, Հմայակ Հովհաննիսյանից պահանջում է 7 միլիոն: Իսկ քրեական գործն առնչվում է «մատների կոտրմանը». այն է՝ Հմայակ Հովհաննիսյանը միջին ծանրության վնասվածք է պատճառել Ջուլհակյանին, ինչը Հովհաննիսյանը կատեգորիկ ժխտում է:

Թերթը հիշեցնում է, որ խնդիրն առնչվում է «Հայհիդրոէներգոնախագիծ» ՓԲԸ-ի շենքին, որի բաժնետոմսերը գնել է Ջուլհակյանը, որի մի բաժնեհարկում տեղակայված է Հմայակին պատկանող Քաղաքագետների միությունը: Երեկ ոստիկանության քննչական վարչություն էր կանչվել Հմայակ Հովհաննիսյանը, որտեղ հայտարարել են, որ հարուցված քրեական գործով մինչ այդ վկա Հովհաննիսյանն այլևս կասկածյալ է, և, որպես խափանման միջոց, ընտրվել է քաղաքից չբացակայելու մասին ստորագրությունը:

«Այն օրվանից, երբ հայտարարեցի, որ առաջադրվելու եմ պատգամավորության թեկնածու, դարձա կասկածյալ»,- թերթի հետ զրույցում ասել է Հմայակ Հովհաննիսյանը: