«Չորրորդ ինքնիշխանություն». Գեղարքունիքի մարզպետի պատկերացրած խաղի բանաձևը

Ըստ «ՉԻ» աղբյուրների, մի քանի օր է, ինչ դաշնակցական այրերը լծվել են առաջիկա ՏԻՄ ընտրություններում մի քանի գյուղապետների «անցկացնելու» կարևորագույն պրոցեսների մեջ: Արդեն երրորդ օրն է, ինչ Գեղարքունիքի մարզային իշխանությունները բանակցություններ են վարում դաշնակցական պատասխանատուների հետ՝ կոմպրոմիսային դաշտում տերիտորիալ ճիշտ բաժանում կատարելու համար:

Թերթին հասած տեղեկությունների համաձայն, Գեղարքունիքի նորանշանակ մարզպետ Ռաֆիկ Գրիգորյանը ՏԻՄ ընտրությունների հետ կապված հարցը շատ հստակ է դրել՝ ասելով, որ մարզում 60-70 տոկոս հաղթելու են ՀՀԿ-ական համայնքի ղեկավարներն ու ՀՀԿ-ական նշանակության նոր թեկնածուները: Լավագույն դեպքում կարող են պահպանվել և մի երկուսով էլ ավելանալ ԲՀԿ-ի տեղերը, դե իսկ որոշ համայնքներում էլ ձևի համար մի քանի դաշնակցական գյուղապետեր կլինեն, որպեսզի նրանք էլ մյուս համայնքներում իրենց ձայները զիջեն ՀՀԿ-ին:

Ահա այսպիսին է Գեղարքունիքի մարզպետ Ռաֆիկ Գրիգորյանի պատկերացրած խաղի բանաձևը, որի վերջը ով իմանա, թե ինչ անկանխատեսելի զարգացումներ կարող է խոստանալ: Մանավանդ որ մարզային իշխանությունները սովորականի նման սկսել են իրենց սեփական խաղի մեջ ներգրավել մարզի դպրոցի տնօրեններին, որոնք, ձևավորված կարծիքի համաձայն, ընտրությունից ընտրություն պոտենցիալ ձայն ապահովողներ են: