Էդուարդ Շարմազանովն ընդունեց Կանադայի համայնքների պալատի ներկայացուցիչներին

ՀՀ ԱԺ հասարակայնության և տեղեկատվության միջոցների հետ կապերի վարչությունից տեղեկացնում են, որ ԱԺ փոխնախագահ Էդուարդ Շարմազոնովը հուլիսի 17-ին ընդունել է Կանադայի համայնքների պալատի անդամներ, Կանադա-Հայաստան խորհրդարանական բարեկամության խմբի փոխնախագահներ Ջիմ Կարիջիանիսին և Ալեքսանդր Բուլրիսին:

Ողջունելով կանադացի պատգամավորների այցը Հայաստանի խորհրդարան՝ Էդուարդ Շարմազանովը նշեց, որ Կանադան բարեկամ երկիր է, և չնայած Հայաստանից բաժանված է օվկիանոսով, բայց տարածությունը լավ հարաբերությունների վրա ազդեցություն ունենալ չի կարող: Ի դեմս Համայնքների պալատի ներկայացուցիչների, նա երախտագիտություն հայտնեց Կանադային՝ Հայոց ցեղասպանությունը ճանաչելու, տարիների հայանպաստ գործունեության համար: ՀՀ Ազգային ժողովի փոխնախագահը կարևորեց նախագահական ընտրություններին դիտորդական առաքելությամբ մասնակցելու նպատակով Լեռնային Ղարաբաղ մեկնող կանադացի պատգամավորների այցն Արցախի ժողովրդի համար, ինչը, նրա խոսքով, ցույց է տալիս, որ այնպիսի ժողովրդավարական երկիր, ինչպիսին Կանադան է, հետաքրքված է ԼՂ-ում ժողովրդավարության ընդլայնմամբ:

Շնորհակալություն հայտնելով ցուցաբերված ջերմության համար՝ կանադացի հյուրերը շեշտեցին, որ չնայած իրենց այցին շատերը, մասնավորապես՝ ադրբեջանցիներ, դեմ են եղել, բայց իրենք մեծ ցանկություն ունեն ականատես լինելու ժողովրդավարության կայացմանը Լեռնային Ղարաբաղում: Նրանց խոսքով՝ Կանադան մեծ շահագրգռվածություն է ցուցաբերում բոլոր այն երկրներում, որտեղ ժողովրդավարությունը կայացման ճանապարհ է անցնում: Ինչպես նկատեցին կանադացի խորհրդարանականները, Կանադայում ապրող շուրջ հարյուր հազար հայերը շատ ակտիվ են. հայկական համայնքը երկրորդ-երրորդ տեղում է իր ազդեցիկությամբ, «հայկական կրակը միշտ վառ է»:

Կանադայի համայնքների պալատի անդամները խոսեցին Հայաստանում դեսպանատուն ունենալու անհրաժեշտությունից, ինչին ի պատասխան՝ պարոն Շարմազանովը նշեց, որ հայկական կողմը միայն շահագրգռված է էլ ավելի բարձր մակարդակով հարաբերություններով: Կարծիք հայտնվեց, որ պետք է ավելի ակտիվացնել պատգամավորական փոխայցելությունները, ինչն էլ իր հերթին կխթանի լավ հարաբերությունների ամրապնդումն ու զարգացումը: Էդուարդ Շարմազանովն իր հերթին նկատեց, որ Հարավային Կովկասում Հայաստանն առաջինն է եղել, որ Օտտավայում բացել է դեսպանատուն, ինչը վկայում է Հայաստանի համար հայ-կանադական հարաբերությունների կարևորության մասին:

Կանադացի խորհրդարանականները հույս հայտնեցին, որ Լեռնային Ղարաբաղում նախագահական ընտրությունները կանցնեն բարձր մակարդակով, և ներկայացրեցին իրենց գաղափարը՝ Կանադա վերադառնալուն պես նախաձեռնելու «Լեռնային Ղարաբաղի ընկերներ» կոչվող խումբ, ինչը մեծ ոգևորությամբ ընդունվեց ՀՀ Ազգային ժողովի նախագահի կողմից: Վերջինս նշեց, որ փայլուն գաղափար է, համոզմունք հայտնելով, որ Հայաստանն ու ամբողջ հայությունը կողջունեն այն, քանի որ դա առարկայական օրինակ է, թե ինչպես կարելի է աջակցել երիտասարդ ժողովրդավարական երկրին:

Հանդիպման ընթացքում քննարկվեցին երկկողմ հետաքրքրություն ներկայացնող այլ հարցեր ևս: