Ինչո՞ւ է Փաշինյանն իր շուրջը համախմբում բացառապես ուժայիններին

 

Մինչև իշխանափոխությունը շատերը, այդ թվում՝ Նիկոլ Փաշինյանը, քննադատում էին Սերժ Սարգսյանին նոր Սահմանադրության շրջանակներում սուպերվարչապետական լիազորություններ սեփականաշնորհելու համար: Սարգսյանը մեղադրվում էր անձնիշխանական համակարգ կառուցելու և խորհրդարանին կցորդ սարքելու մեջ: ԱԺ-ում այս օրերին քննարկվում է ««Կառավարության կառուցվածքի և գործունեության մասին» օրենքում փոփոխություններ և լրացումներ կատարելու մասին» օրենքի նախագիծը, որից պարզ է դառնում, որ ոչ մի բալանսավորում օրենսդիր ու գործադիր, ավելի ճիշտ՝ օրենսդիր մարմնի ու վարչապետական ինստիտուտի միջև տեղի չի ունենալու, քանզի ուժայինները մնացել են վարչապետին կից կառույցներ և որևէ կերպ հաշվետու չեն օրենսդիրին:

 

Ինչո՞ւ է Փաշինյանը այդպես ցանկանում շրջապատել իրեն ուժայիններով և պահել նրանց, այսպես ասած, «կանտրոլի տակ»: Փաշինյանն իրականում հասկանում է, որ եթե այսպես շարունակվի, մարդիկ շարունակեն չկատարված խոստումների կատարումը պահանջել փողոցներում՝ զանազան բողոքի ակցիաներ կազմակերպելով՝ իր միակ թիկունքը մնալու են հենց ուժայինները: Մինչդեռ այդ թիկունքը այսօր, մեղմ ասած, թույլ է, քանի որ հենց համակարգի ներսում կա իրավիճակից դժգոհ մի ստվար զանգված: Դրանք այն մարդիկ են, ովքեր չհամակերպվեցին, օրինակ, տրանսգենդերի՝ ոստիկանության բաժանմունք մտնելու և այնտեղ ծեծ ու ջարդ կազմակերպելու հետ, դրանք այն ներքին զորքերի ծառայողներն են, ովքեր չեն ցանկանում կոպեկներով գնալ առաջնագիծ: Այս պայմաններում հասկանալի է, որ Փաշինյանը պետք է փորձի սիրաշահել ուժայիններին՝ վերահսկողական լծակները ձեռքից չտալու նպատակով…