Փաշինյանի «վերջին հույսի» փիառը
Վերլուծական
Օրերս մամուլում տեղեկություն էր տարածվել, որ համապատասխան ծառայությունները Նիկոլ Փաշինյանի սեղանին են դրել մի շարք սոցիոլոգիական հետազոտություններ, որոնք վկայում են այն մասին, որ վարչապետի վարկանիշը վերջին 2 ամսվա ընթացքում սրընթաց անկում է ապրում: Այս պահի դրությամբ այն կազմում է մոտ 40-45 տոկոս: Նախորդ ամսվա ընթացքում նա կորցրել է 25 տոկոս վարկանիշ: Իհարկե, սա հանգամանք է, որը ստիպում է վարչապետին կոնկրետ քայլեր իրականացնել այդ վարկանիշի բարձրացման ուղղությամբ:
Սակայն զավեշտը կայանում է նրանում, որ ըստ էության՝ կամ Փաշինյանի «փիառշիկների» երևակայությունն է անչափ սնանկ դարձել, կամ էլ վերջացել են այն գործնական, քիչ թե շատ երևացող քայլերը, որոնք հանրությանը հրամցնելով, հնարավոր կլիներ բարձրացնել Փաշինյանի՝ սրընթաց անկում գրանցող վարկանիշը: Բանը հասել է նրան, որ վարչապետի փիառի վրա աշխատողները որոշել են դիմել ժողովրդական բանահյուսության ժանրին: Մամուլում սկսել են տարածել մի տեղեկություն, թե օրերս ճանապարհային ոստիկանը կանգնեցրել է օրինախախտ վարորդի, ով հայտարարել է, թե ինքը վարչապետի սանիկն է։ Բնականաբար, ոստիկանը չի հավատացել, սանիկն էլ զանգել է քավորին: Երբ ոստիկանը ողջունել է վարչապետին, հաճելիորեն զարմացել է՝ լսելով, թե ինչ հրահանգ է տալիս Փաշինյանը։ Ըստ այս «լեգենգի»՝ վարչապետը ՃՈ աշխատակցին ասել է՝ պատժել օրենքի խստությամբ: Ոստիկանն էլ, իր մաշկի վրա զգալով իրավիճակի փոփոխությունը, այդ դեպքից հետո դուխով բոլորին պատմում է այս լեգենդը:
Զարմանալի է միայն, որ հայտնի չէ ո՛չ սանիկի անունը, ո՛չ նրա ավտոմեքենայի պետհամարանիշը: Թե ով է այդ երևակայական սանիկը, մնում է միայն ենթադրել: Օրեր առաջ էլ, ի դեպ, վարչապետը հայտարարել էր, որ չարաշահման մեջ մեղադրանք և կալանքի որոշում է կայացվել իր մերձավոր բարեկամներից մեկի նկատմամբ: Անգամ եթե Փաշինյանի ազգականը իսկապես հանդիսանում է քրեական գործի ֆիգուրանտ՝ Փաշինյանը այս պատմությունից առավելագույն փիառ դիվիդենտներ փորձեց քաղել: Վարչապետից, իհարկե, փորձել են ճշտել, թե ով է նրա իսկ ցուցումով կալանավորված ազգականը, սակայն վարչապետը հղում է արել նախաքննական գաղտնիքին: Զարմանալի է, որովհետև հեղափոխությունից երկու-երեք ամիս անց ոչինչ չէր կաշկանդում Փաշինյանին Ազատության հրապարակի ամբիոնից բարձրաձայնել, ոչ միայն նախաքննական, այլ նաև բանկային գաղտնիք պարունակող տեղեկատվությունը: «Օրինախախտ սանիկի» պատմությունը ևս ամբողջությամբ տեղավորվում է այս փիառ ակցիայի տրամաբանության մեջ:
Վարչապետի և նրա փիառի վրա աշխատող թիմի մոտիվացիան իհարկե հասկանալի է: Փաշինյանը անչափ շատ է ուզում հանրությանը ցույց տալ որ մեկն է նրանցից, փորձում է անկողմնակալ և արդար ղեկավարի իմիջ ձեռք բերել, ասել է թե ստեղծել նրանից հայկական Լի Կուան Յու ստեղծել: Լի Կուան Յու-ն հիշեցնենք Սինգապուրի վարչապետն էր, ով կոռուպցիայի դեմ պայքարում չէր խնայում անգամ իր հարազատներին: Սակայն այն մասին, որ այս համեմատությունը տեղին չէ խոսում է առաջին հերթին այն փաստը, որ իշխանությունը ստանձնելուց մեկ տարի անց Սինգապուրի վարչապետը իրականացրել էր 114 ռեֆորմ և բոլոր այդ ռեֆորմներն էլ մեկ տարվա ընթացքում գործնական արդյունքներ էին տվել: Ինչ վերաբերվում է Փաշինյանին , ապա փաստենք, որ նրա ռեֆորմները այս այնքան անհաջող և անտաղանդ էին, ինչպես և իր փիառշիկների աշխատանքը: Ավելին, փիառվելու անհրաժեշտության առաջացման պատճառներից մեկն էլ հենց այդ ռեֆորմների ձախողումն է...
Այս ամենն արդեն ոչ միայն անլուրջ է, այլ մեղմ ասած, անպատասխանատվության և անլրջության դրսևորում է, որովհետև քաղաքացիների խնդիրները, կառավարության, Նիկոլ Փաշինյանի այդ ինքնագովազդի համեմատ, տասնապատիկ ավելի լուրջ են: Մարդիկ չեն կարողանում ապրել, ու կառավարությունից, իշխանությունից սպասում են այդ հարցում իրենց կարողություններն ավելացնելու առարկայական գործեր: Ինչպես երևում է՝ սանիկին «գայի դուռը գցելը» այլևս չի անցնում, պետք է կամ նոր փիառ գործիքներ ընտրել, կամ էլ ի վերջո լրջանալ և անցնել գործի:
ՈՒՂԻՂ ԵԹԵՐ
Ամենադիտված 
Մահացել է երգիչ Հովհաննես Գրիգորյանը
