«Իմ քայլի» բենեֆիսը՝ թանկ հաճույք հարկատուների համար

Վերլուծական 18 Ապրիլ, 2019 20:00

Հայաստանի կառավարությունը, չնայած բյուջեի սղությանը և տնտեսական աճի անկմանը, շարունակում է ճոխ-ճոխ ծախսեր անել: Մասնավորապես, «Քաղաքացու օրվան» նվիրված միջոցառումների անցկացման համար ՀՀ կառավարության պահուստային ֆոնդից կտրամադրվի 124 մլն դրամ: Այդ գումարով Հայաստանի բոլոր մարզերում և Երևան քաղաքում պետք է պատշաճ կերպով իրականացվեն «Քաղաքացու օրվան» նվիրված միջոցառումները:

Հասկանալի է իհարկե, որ 124 միլիոն դրամը ներկա իրավիճակում հսկայական գումար է, որը կառավարությունը, ցանկության դեպքում, կարող էր ուղղել շատ ավելի ակտուալ և առաջնահերթ լուծում պահանջող խնդիրների լուծմանը: Օրինակ՝ ոռոգման ենթակառուցվածքների վրա՝ 74 միլիոն դրամ, վերելակների վերանորոգում` 109 միլիոն դրամ, կարելի էր առողջապահական կազմակերպությունների բժշկական սարքավորումներ ձեռքբերել ՝ 70 միլիոն դրամ, մայրուղիների և փողոցների վերանորոգելը՝ 50 միլիոն դրամ, Հայաստանի մանկապատանեկան մարզադպրոցներ, մարզաձեւերի ազգային ֆեդերացիաներ եւ այլ մարզական հասարակական կազմակերպությունների համար ապահովել մարզական գույքի ձեռքբերումը՝ 100 միլիոն դրամ, Երևանում երթուղային նոր ցանց ներդնել՝ 100 միլիոն դրամ, աղետի գոտում 15-20 ընտանիքի բնակարանով ապահովել, 33 տոկոսով ավելացնել երիտասարդ գիտնականների ֆինանսավորումը, կարելի էր փոխհատուցել շուրջ 25 ապագա բժիշկների 5 տարվա ուսման վարձերը և բազմաթիվ այլ գործնական ծրագրեր, որոնց իրականացումը հնարավոր կդառնար հավելյալ 124 միլիոն դրամ հատկացնելու դեպքում: Ժամանակին՝ երեկվա ընդիմադիրների, այսօր արդեն՝ իշխանության եկած մի շարք գործիչների կողմից, քննադատվել էր նախկին քաղաքապետ Տարոն Մարգարյանի կողմից Երևանի համայնքային բյուջեից 73 մլն դրամ, այսինքն՝ մոտ 180 հազար դոլար մայրաքաղաքում դրոշների տեղադրման համար հատկացնելը: Այսօր նորերը, ըստ էության, ձգտում են «խփել» հների ռեկորդները:

Փոխարենը, սակայն, հեղափոխությունից մեկ տարի անց, բյուջեի սեղմ միջոցները հատկացվելու են փուչիկների, դրոշակների, ինչու ոչ, նաև էդուարդ Աղաջանյանի՝ դիջեյ ընկերներին հրավիրելու վրա: Դե, մի մասն էլ, ավանդույթի համաձայն, կհանգրվանի մի շարք պաշտոնյաների գրպանում..․