Հիմա էլ մարիխուանայի պատճառո՞վ ենք ՀԱՊԿ-ում «բոյ» տալու

Վերլուծական 22 Ապրիլ, 2019 17:25

Երեկ պարզ դարձավ, որ մարիխուանա թմրանյութի օրինականացման ջատագով և Սուրբ Զատիկի օրով այդ թմրամիջոցի փիառ ակցիան իրականացրած Ալեքսանդր Բաղդասարյանն «Իմ քայլը դաշինքի պատգամավոր Նիկոլայ Բաղդասարյանի եղբայրն է։ Ինքը՝ պատգամավորը, սակայն, լրագրողների հետ զրույցում փորձեց ստեղծել տպավորություն, որ ոչ ինքը, ոչ էլ «Իմ քայլը» դաշինքը որևէ աղերս չունեն այդ ակցիայի հետ:

Հետաքրքիր է, իսկ կառավարության ի-դրաֆթ հարթակում տեղադրած օրենսդրական նախաձեռնությունը, որով առաջարկվում է լեգալիզացնել որոշ թմրամիջոցների օգտագործումը և վաճառքը՝ քողարկելով դա առողջապահական պահանջներով, նո՞ւյնպես վրիպել է նոր իշխանությունների ուշադրությունից: Հիշեցնենք, դեռեւս Երևանի ավագանու անդամ Ալեն Սիմոնյանն իր հացազրույցներից մեկում նշել էր՝ վստահ է, որ մարիխուանայի օրինականացումը ժամանակի խնդիր է։ ԱԺ նախագահ Արարատ Միրզոյանն էլ կարծում է, որ մարիխուանա օգտագործելը թմրամոլություն չէ, բյուջեի մասով էլ եկամուտներ կապահովվի: Թերևս «Նոր Հայաստանի» իշխանությունների մոտեցումն այս հարցում հստակեցված է:

Պարզապես, սույն պարոնայք գուցե չգիտեն, իսկ գուցե չեն ցանկանում իմանալ, որ մարիխուանայի օրինականացումը Հայաստանում լուրջ խնդիրների է հանգեցնելու՝ կապված Հայաստանի ստանձնած միջազգային պարտավորությունների հետ: Բանն այն է, որ օրինակ, ՀԱՊԿ կանոնադրության 8-րդ հոդվածը արգելքներ է սահմանում: Հոդվածում հստակ նշում է, որ «կազմակերպության անդամները համատեղ ջանքեր են գործադրում միջազգային ահաբեկչության, ծայրահեղականության, թմրանյութերի, հոգեմետ դեղամիջոցների, զենքերի անօրինական շրջանառության դեմ»: ՀԱՊԿ կանոնադրության հետևումը պարտադիր է անդամ բոլոր երկրների կողմից: Եթե անգամ կազմակերպության որևէ երկիր որոշի «բռնել մարիխուանայի օրինականացման ճանապարհը», ապա դա պետք է քննարկվի մյուս բոլոր պետություններում նույնպես՝ այն թույլատրելու համար: Պատճառն այն է, որ ՀԱՊԿ-ում բոլոր որոշումներն ընդունվում են կոնսենսուսով: Ռուսաստանն էլ մարտական է տրամադրված թմրամիջոցների պայքարի դեմ: Ստացվում է, որ պարոնայք իմքայլականները չգիտակցված կամ գուցե գիտակցաբար՝ գնում են ՀԱՊԿ-ում նոր սկանդալի հասունացմանը...