Շանտա՞ժ, թե՞ օգնություն. ո՞ր տարբերակը կնախընտրի Մոսկվան

Վերլուծական 25 Ապրիլ, 2019 18:00

Երեկ երեկոյան հայտնի դարձավ մի իրադարձության մասին, որը կարող է գլխիվայր շուռ տալ Միհրան Պողոսյանի շուրջ կառուցվող քրեական գործը։ Ռուսաստանի Դաշնության կազմում ընդգրկված Կարելիայի Հանրապետությունում ձերբակալված ԴԱՀԿ ծառայության նախկին պետ Միհրան Պողոսյանը հիմքեր ունի Ռուսաստանում քաղաքական ապաստան խնդրելու համար. «Ռունա» գործակալությանը հայտնել է Պողոսյանի պաշտպան, Կարելիայի Փաստաբանների պալատի նախագահ Միխայիլ Յամչիտսկին: «Միջնորդությունն արդեն պաշտոնապես ներկայացվել է: Քաղաքական ապաստան տրամադրելու որոշումը կայացնում է ՌԴ նախագահին կից գործող հանձնաժողովը: Իմ կարծիքով՝ դրա համար կան հիմնավորումներ: Միհրան Պողոսյանին հայրենիքում հետապնդում են քաղաքական շարժառիթներով»,- ասել է փաստաբանը:

Իրականում, ստեղծված իրավիճակում հնարավոր սցենարներն այնքան էլ շատ չեն: Խնդիրը հետևյալն է՝ արդյո՞ք Պողոսյանի գործն ունի ՌԴ համար այն քաղաքական կալիբրը, որպեսզի նրան քաղաքական ապաստան տրամադրելով՝ էլ ավելի սրացնեն Հայաստանի հետ՝ առանց այդ էլ ոչ հարթ ընթացող հարաբերությունները: Թե՞ Միհրան Պողոսյանի հարցը, այնուամենայնիվ, Մարտի 1 չէ, որևէ կերպ չի կապվում երկրորդ նախագահ Ռոբերտ Քոչարյանի հետ և այստեղ ՌԴ-ն կարող է ընդառաջել Փաշինյանին, հատկապես, հաշվի առնելով վերջինիս՝ Մոսկվային սիրաշահելու մեծ ցանկությունը: ՌԴ-ն կարող է նաև արհեստականորեն ձգձգել Միհրան Պողոսյանին քաղաքական ապաստան տրամադրելու հարցը՝ Փաշինյանից ինչ-ինչ փոքր զիջումներ կորզելու նպատակով, սակայն այստեղ էլ կրկին ի հայտ է գալիս այդ նույն՝ քաղաքական կալիբրին վերաբերվող հարցը: Արդյո՞ք Փաշինյանի համար Միհրան Պողոսյանին Հայաստանում դատելու հարցը այնքան կարևոր է ու սկզբունքային, որ ռուսական շանտաժը կարող է հաջողել…