Նիկոլ Փաշինյանի «ֆանտաստիկան» և բլեֆը

Վերլուծական 26 Ապրիլ, 2019 19:00

Facebook-ի իր էջի ուղիղ եթերում ՀՀ վարչապետ Նիկոլ Փաշինյանն անդրադարձել է իր այն հայտարարությանը, որ հեղափոխությունից հետո Հայաստանում ստեղծվել է ավելի քան 50.000 աշխատատեղ: Նա ըստ ոլորտների հրապարակել է այդ աշխատատատեղերը և դրանց ստեղծումը անվանել ֆանտաստիկա:

Ցանկացած իշխանություն իր ձեռքբերումները փորձում է ներկայացնել հանրությանը` վկայակոչելով Ազգային վիճակագրական ծառայության տվյալները: Տարիներ շարունակ ԱՎԾ-ն ներկայացրել է հուսադրող տվյալներ, թե իբր տնտեսության առաջընթացն ակնառու է և դինամիկ զարգացումը՝ կանխատեսելի: ՀՀ նախորդ նախագահ Սերժ Սարգսյանը բարձրաձայնել էր, որ 2040թ-ին կունենանք 4 մլն բնակչություն, այսօր ՀՀ վարչապետ Նիկոլ Փաշինյանը հայտարարում է, որ բացվել է 50 հազար աշխատատեղ: Ի դեպ, Սերժ Սարգսյանը հայտարարել էր, որ կարևորը՝ թղթերով ամեն ինչ ճիշտ լինի:

Սակայն հարցերը, միևնույնն է, շատ են: Օրինակ, փետրվար ամսվա պաշտոնական տվյալներով՝ Հայաստանում աշխատունակ բնակչության 20,8 %-ը՝ 228,8 հազար մարդ՝ գործազուրկ էր, որը նախորդ ամիսներին արձանագրված ցուցանիշերից գրեթե չէր տարբերվում: Արդյունաբերությանը եւ տնտեսության այլ ոլորտներին վերաբերող վերլուծականներն էլ փաստում էին, որ շատ ճյուղերում, մասնավորապես՝ մետաղագործության եւ հանքարդյունաբերության մեջ, ունենք ցուցանիշերի ակնհայտ անկում, որը, բնականաբար, ուղեկցվել է աշխատատեղերի փակմամբ:

Վերոնշյալ աշխատատեղերի մասին խոսելիս, ուշագրավ են նաև «ստեղծվել» եւ «ստվերից դուրս բերվել» արտահայտությունները, որոնք տարբեր նշանակություն ունեն, բայց Նիկոլ Փաշինյանն այդ բառերը ներկայացում է որպես հոմանիշներ։ Այսինքն, վերոնշյալ 50 հազարը, որը նույն պահին դարձավ 51 հազար (հավանաբար փաշինյանական «կախարդական փայտիկի» զորությամբ), ըստ դրա մասին խոսողի՝ ե՛ւ ստեղծված, ե՛ւ ստվերից բերված աշխատատեղերն են։ Ո՞ր մասն է ստեղծված, ո՞ր մասը՝ ստվերից դուրս բերված՝ չի պարզաբանվում։ Եթե 50 հազար աշխատատեղ է ստվերից դուրս եկել, ինչպե՞ս է «1000 դրամների» հիմնադրամում ավելացել ընդամենը 5026 աշխատողի վճարած 1000 դրամ: Սրանք հարցեր են, որոնք այդպես էլ չեն պարզաբանվում:

Իհարկ,ե վարչապետը կարող է տեղեկանքներ ներկայացնել, որպեսզի իր խոսքերը չհնչեն օդից վերցրած, սակայն Հայաստանի քաղաքացիներն էլ ունեն իրավունք՝ չվստահելու պետական մարմիններին, այն պարզ պատճառով, որ բյուջետային եկամուտների հետ վերջին ամիսներին տեղի են ունենում անհասկանալի տեղաշարժեր, որոնց նպատակն է ամեն կերպ ապահովել Նիկոլ Փաշինյանի հայտարարությունների իրավացիությունը: