Տոնոյանի երկրորդ ակնարկը՝ Փաշինյանին

Վերլուծական 26 Ապրիլ, 2019 18:00

ՀՀ ՊՆ ղեկավար Դավիթ Տոնոյանն այսօր պատասխանելով լրագրողների այն հարցին, թե ճի՞շտ են արդյոք այն տարածվող տեսակետները, որ 2016 թվականի Ապրիլյան պատերազմը պայմանավորված է եղել ՀՀ վերին օղակների հետ, հայտարարել է՝ «Ապրիլյան պատերազմում որևէ պայմանավորվածություն չի եղել, չկա նման բան»։

Հիշեցնենք, մի քանի ամիս առաջ թե՛ վարչապետ Փաշինյանը, թե՛ իր թիմակիցները, մասնավորապես, Անդրանիկ Քոչարյանը ակնարկում էին, որ առկա են գաղտնի փաստաթղթեր, որոնք որոշակի տարակուսանքներ են առաջացնում՝ կապված Ապրիլյան պատերազմի՝ պայմանավորված լինելու հետ, և հարցի այդ ասպեկտը լուրջ հետաքննության կարիք ունի:

Փաստորեն, Տոնոյանի՝ նման կտրող պատասխանը մեսիջ է երկրի քաղաքական ղեկավարությանը, որ վերջիններս չփորձեն բանակը ներգրավել քաղաքական խաղերի մեջ՝ դիվիդենտներ շահելու նպատակով: Ի դեպ, սա առաջին նմանատիպ մեսիջը չէ: Մի քանի ամիս առաջ էլ Տոնոյանը, ի հեճուկս երկրի քաղաքական էլիտայի կողմից հնչող հայտարարությունների, նշեց, որ մարտիմեկյան հայտնի իրադարձություններին ԶՈՒ-ն ներգրավված է եղել և կատարել է իր պարտականությունները: Բացի այդ, նա հայտարարել էր, որ «Մարտի 1»-ի քրեական գործը ե՛ւ ավագ կազմի, ե՛ւ բարձրագույն սպայական կազմի տրամադրությունների վրա որոշակի ազդեցություն ունենում է՝ հաշվի առնելով նախաքննության փուլը: Հասկանալի է, թե ինչ նկատի ուներ Տոնոյանը, հաշվի առնելով քաղաքական ղեկավարության ջանքերը՝ ամեն կերպ հանրային մտայնության մեջ արմատավորել, որ բանակն այն ժամանակվա իշխանությունների կողմից ներգրավվել է հայտնի իրադարձությունների մեջ: