Մարտերը հասան Դամասկոսի կենտրոն

Մարտերը Սիրիայի մայրաքաղաք Դամասկոսի համար շարունակվում են: Այս պահին մարտական գործողությունները, բացի Դամսկոսի հարավ-արևելյան, արևելյան և նույնիսկ հյուսիս-արևելյան թաղամասերից հասել են մինչև քաղաքի կենտրոնական հատվածներ: Այդ մասին հաղորդում է BBC-ն:

Ինչպես տեղեկացրել էինք՝ այսօր Սիրիական ազատ բանակի կազմակերպած ահաբեկչության հետևանքվ սպանվեցին Սիրիայի պաշտպանության նախարարը և նրա տեղակալը, ինչպես նաև վիրավորվեցին ներքին գործերի նախարարը, հետախուզական ծառայության ղեկավարը և մի շարք այլ պաշտոնյաներ: Ահաբեկչությանը հաջորդեցին պայթյուններ 4-րդ մեխանիզացված բրիգադայի բազայի շրջակայքում: 4-րդ բրիգադան ամենաակտիվներից է ընդդիմադիրների դեմ պայքարում և ղեկավարվում է երկրի նախագահի եղբոր կողմից:

Ապստամբների Սիրիական ազատ բանակը երեկ հայտարարել էր, որ իրենք իրագործում են «Դամասկոսի հրաբուխ» օպերացիան, որի նպատակն է ազատագրել մայրաքաղաքը: Այսօր արդեն քաղաքում մարտերի 4-րդ օրն է, և ընդդիմադիրները վերահսկում են Միդան և Քաբուն թամասերերը: Վերջիններս, France-Presse-ի հաղորդմամբ, պարբերաբար հրետանակոծվում են կառավարական զորքերի կողմից: Հաղորդվում է նաև կառավարական զորքերի կողմից ուղղաթիռների, տանկերի և այլ զրահատեխնիկայի կիրառման մասին:

Երեկ և այսօր մարտական տեխնիկայի կիրառմամբ դաժան մարտեր են տեղի ունեցել Սիրիայի մայրաքաղաքի կենտրոնական` Բաղդադի փողոցի վրա և Սաբաա-Բահարտ թաղամասում, ուր կան մի շարք կառավարական շինություններ: Մարտերը արդեն մոտեցել են նախագահի նստավայրին և պառլամենտի շենքին: Պայթյուններ և հրաձգություն է լսվում Դամասկոսի համարյա բոլոր թաղամասերում: Reuters-ի հաղորդմամբ, մայրաքաղաքի որոշ թաղամասեր հրետանակոծվում են մերձակայքում գտնվող սարերի և բլուրների վրա դիրքավորված կառավարական հրետոնու կողմից:

Իսրայելի բանակի հետախուզական ծառայության ղեկավարը՝ Ավիվ Կոչավին, երեկ հայտարարել էր, որ Սիրիան իր զորքերը դուրս է բերել Իսրայելի սահմանից՝ ուղարկելով դրանք Դամասկոս: Եթե հաշվի առնենք, որ Իսրայելը Սիրիայի ոխերիմ և դարավոր թշնամին է, ապա կարելի է ենթադրել, որ այդ հանգամանքը խոսում է Բաշար Ասադի ռեժիմի ծայրահեղ ծանր վիճակի մասին:

Ինչպես հաղորդում է Guardian-ը՝ մի շարք ոստկանական բաժանմունքներ և զորամիավորումներ երեկ և այսօր անցել են ընդդիմադիրների կողմ: Շատ փորձագետներ և պարբերականներ այլևս կասկածի տակ չեն առնում այն, որ Բաշար Ասադի ռեժիմի օրերը հաշված են: Lenta.ru-ն էլ հայտնում է, որ հնարավոր է՝ Սիրիայի նախագահը դիմի փախուսի և տեղափոխվի Ռուսաստան՝ այժմ Սիրիայի ափերի մոտ գտնվող ռուսական ռազմանավերով: