Նոր որակ՝ Հայաստան-Լիբանան կրթական համագործակցության

«Ազդակ» օրաթերթի հրապարակման համաձայն` Լիբանանի Հանրապետություն կատարած պաշտոնական այցի շրջանակում, ՀՀ կրթության և գիտության նախարար Արմեն Աշոտյանի գլխավորած պատվիրակությունը, որի կազմում են ՀՀ հատուկ հանձնարարություններով դեսպան, «Փյունիկ» բարեգործական հիմնադրամի հոգաբարձուների խորհրդի նախագահ Լևոն Սարգսյանը, ՀՀ ԿԳՆ աշխատակազմի ղեկավար Մհեր Ղազարյանը և Հայաստանի պետական տնտեսագիտական համալսարանի ռեկտոր Կորյուն Աթոյանը, պաշտոնական հանդիպում է ունեցել Լիբանանի հանրակրթության և բարձրագույն կրթության նախարար Հասսան Տիապի հետ:

Հանդիպման ընթացքում քննարկվել են երկու երկրների կրթական համակարգերի զարգացման, մշակված կրթական նոր ծրագրերի և երկկողմ համագործակցության հեռանկարներին վերաբերող հարցեր:

Պաշտոնական հանդիպումից հետո նախարար Արմեն Աշոտյանն իր գործընկերոջն է փոխանցել Հայաստանի Հանրապետության կողմից հատկացված 120 լաբորատոր սարքավորումները և նմուշները, որոնք պետք է տրամադրվեն լիբանանյան 120 պետական դպրոցներին:
Հանձնման արարողությունից հետո նախարարներ Ա. Աշոտյանը և Հ. Տիապը հանդես են եկել համատեղ մամուլի ասուլիսով, որի ընթացքում երկկողմ հանդիպումը գնահատել են արդյունավետ ու հեռանկարային: Լիբանանի Հանրապետության հանրակրթության և բարձրագույն կրթության նախարար Հ. Տիապը շնորհակալություն է հայտնել Հայաստանին՝ տրամադրած նվիրատվության համար և ընդգծել, որ սարքավորումների կիրառումը կնպաստի ուսուցման որակի բարձրացմանը: «Այս սարքավորումների շնորհիվ գործնական հիմքերի վրա է դրվում ուսուցման գործընթացը, որը լիբանանցի աշակերտներին հնարավորություն է տալիս ավելի հեշտ ընկալել բնագիտության, քիմիայի, կենսաբանության և աշխարհագրության վերաբերյալ նյութերը», - նշել է նախարար Տիապը և հույս հայտնել, որ երկու երկրների միջև կրթական համագործակցության նոր որակ կձևավորվի:
ՀՀ կրթության և գիտության նախարար Արմեն Աշոտյանը նշել է, որ Հայաստանի կողմից հատկացված այս նվիրատվությունը խորհրդանշում է երկու երկրների միջև գոյություն ունեցող բարեկամությունն ու պատմական հարաբերությունները: Նա վստահություն է արտահայտել Հայաստանի և Լիբանանի միջև համագործակցության կապերի հետագա զարգացման վերաբերյալ: «Մենք կարևորում ենք արաբական երկրների հետ համագործակցության ընդլայնումը, ուսանողական կրթաթոշակների տրամադրումը, որը հնարավորություն է տալիս ինչպես միջմշակութային հաղորդակցության, այնպես էլ հայ ուսանողներին արաբերենի իմացությունների զարգացման համար», - մասնավորապես նշել է նախարարը և հավելել, որ Հայաստանի համար կրթության ոլորտն առաջնահերթություն է, և ՀՀ կառավարությունը գործադրում է ջանքեր՝ դպրոցներն ու համալսարաններն երկրի զարգացմանը ծառայեցնելու նպատակով: Նախարար Ա. Աշոտյանն ընդգծել է նաև Լիբանանի նախագահ Միշել Սլեյմանի՝ Հայաստան կատարելիք այցի նախապատրաստական աշխատանքների կարևորությունը` շեշտելով, որ պաշտոնական այցելության ծրագրերում հատուկ տեղ է հատկացվելու կրթության ոլորտին:
ՀՀ ԿԳ նախարարը պաշտոնական այցի շրջանակում այցելել է նաև Հայկազյան համալսարան և հանդիպում ունեցել տեղի ուսանողության հետ: Հանդիպման ընթացքում նախարարը ներկայացրել է Հայաստան-Լիբանան կրթական համագործակցության ներկա վիճակն ու հեռանկարային ծրագրերը, ինչպես նաև անդրադարձել է ՀՀ-ում տեղի ունեցող կրթական բարեփոխումների գործընթացին: Նախարարը նշել է, որ բարեփոխումների նպատակը Հայաստանի կրթական համակարգը որակական նոր մակարդակի բարձրացնելն է: «Կրթական նոր կարգեր ներմուծելով՝ մենք փորձում ենք փոխել նաև ուսանողության մտածելակերպը: Մենք համոզված ենք, որ որակյալ կրթություն ստանալու հարցում ամենաշահագրգիռ անձն ուսանողը պետք է լինի», - հանդիպման ընթացքում նշել է Ա. Աշոտյանը:
Այնուհետև՝ Լիբանանում ՀՀ դեսպանատանը ՀՀ ԿԳ նախարարը հանդիպում է ունեցել Լիբանանի հայկական վարժարանների տնօրենների և կրթական ոլորտի մի շարք ներկայացուցիչների հետ :
Լիբանանում ՀՀ դեսպան Աշոտ Քոչարյանն իր ողջույնի խոսքում կարևորել է Հայաստանի կրթական գերատեսչության ղեկավարի պաշտոնական այցը Լիբանան, նշելով, որ երկկողմ միջպետական հարաբերություններում կարևոր նշանակություն է տրվում կրթամշակության ոլորտին: 
ՀՀ ԿԳ նախարար Ա. Աշոտյանը ներկաներին տեղեկացրել է երկու նախարարությունների միջև կնքված պաշտոնական համաձայնությունների և քննարկված բազմաթիվ հարցերի մասին: Հանդիպման ընթացքում Լիբանանի հայկական վարժարանների տնօրենները և ուսումնական խորհուրդների անդամները նախարարին ներկայացրել են լիբանանահայ կրթօջախներում առակա խնդիրներն ու դժվարությունները: 
Ավելի ուշ՝ ՀՀ կրթության և գիտության նախարար Արմեն Աշոտյանը հանդիպել է նաև Լիբանանի հայկական գաղթօջախի ԶԼՄ ներկայացուցիչների հետ, որի ընթացքում զրույց է ծավալվել՝ հայկական գաղթօջախի խնդիրների շուրջ: Սփյուռքահայ լրագրողները ՀՀ ԿԳ նախարարաի հետ հանդիպման ընթացքում մտահոգություն են հայտնել՝ Լիբանանի կրթության բնագավառում թուրքական պետության միջամտությունների առնչությամբ, որոնք, մասնավորապես, դրսևորվում են քարոզչական բնույթի ագրեսիվ նախաձեռնություններով: ԶԼՄ-ների ներկայացուցիչները կարևորել են երկկողմ փոխայցելությունների կազմակերպումը, որը կնպաստի նաև միջպետական կապերի զարգացմանը:
ՀՀ կրթության և գիտության նախարար Արմեն Աշոտյանի գլխավորած պատվիրակության պաշտոնական այցը կավարտվի նոյեմբերի 27-ին: