«Հայկական Ժամանակ». Մարտի 1-ին սպանված Տիգրան Խաչատրյանի մայրը այսօր դիմելու է ՀՔԾ

Մարտի 1-ին սպանված Տիգրան Խաչատրյանի մայրը` Ալլա Հովհաննիսյանը, այսօր նամակով դիմելու է ՀՔԾ, պահանջելով պարզաբանել թե այս տարվա 1-ին կիսամյակի աշխատանքները ամփոփելիս ինչու չի խոսվել Մարտի 1-ի գործի մասին:

«Մարտի 1» հ/կ նախագահ Ալլա Հովհաննիսյանը երեկ թերթի թղթակցին ասել է, որ գործով քննչական խմբի ղեկավարի փոփոխությունից հետո գործը կարծես «քնել է»:

«Մեզ ոչ կանչում են, ոչ ինչ-որ բան են ասում: Եթե ինձ կանչեն, ես բազմաթիվ հարցեր կտամ նրանց»,- ասել է Հովհաննիսյանը և ավելացրել, որ ՀՔԾ-ից իր որդու սպանությունը բացահայտելու առումով որևէ ակնկալիք չունի, սակայն նախաքննական մարմինը լռություն պահպանելու իրավունք չունի:

«Պարզ է, որ այս իշխանությունների օրոք բացահայտումը անհնար է: Քննչական մարմինը կաշկանդված է, չի կարող նորմալ գործ անել: Բայց մենք ուզում ենք ասել, որ գործը բացահայտելու հասարակական պահանջ կա, և մենք` սպանվածների ծնողներս, երբևէ հետ չենք կանգնի այս գործից և հետամուտ կլինենք, որ ամեն ինչ բացահայտվի»,- ասել է մարտի 1-ին սպանված Տիգրանի մայրը: