«Հրապարակ». ԲՀԿ առաջին համարից սկսած պատգամավորների գերակշիռ մասն անցնում է «Հարսնաքարի» նման դեպքերով

Արտահերթ նիստի ստորագրությունների համար տրված 24 ժամն ավարտելուց և ընդամենը 21 ստորագրություն հավաքելուց հետո ՀԱԿ ներկայացուցիչներից մեկը հետաքրքիր դիտարկում է արել՝ ԲՀԿ համամասնական ցուցակին ուշադիր նայելու դեպքում հասկանալի է դառնում, թե ինչու ԲՀԿ-ն շատ արագ «գնաց արձակուրդ». ԲՀԿ պատգամավորների գերակշիռ մասն անցնում է «Հարսնաքարի» նման դեպքերով, առաջին համարից սկսած:

Գագիկ Ծառուկյանի «Մուլտի գրուպի» տղերքը ռուս զինվորական Երմոլովի գործով են անցնում, Սամվել Բալասանյանի տղայի թիկնապահները՝ Գյումրիի գարեջրի գործարանի աշխատակցի սպանության, Վարդան Օսկանյանի որդին՝ ԱԳՆ-ին պատկանող ծառայողական ավտոմեքենայով վրաերթի, Գրիգոր Գրիգորյանը՝ Շերիֆը, մարտի 1-ի «գործով», Արա Արամյանը՝ «Տրիումֆ» ռեստորանի մերձակայքում որդու կրակոցների գործով, Ուրիխանյան Տիգրանը՝ գազային ատրճանակով Միքայել Դանիելյանի վրա կրակելու, Գասպարյան Ռուստամը՝ Արմավիրի շուկայի «կրակոցների», Յուվեցի Կարոն՝ պարտքի դիմաց պարտատիրոջ ոտքին կրակելու, իսկ թե «ինչքան» էին միմյանց վրա «կրակում» Կարամելի Հարութն ու Վերսանդիկ Հակոբյանը, հայտնի է բոլորին:

Նաիրա Զոհրաբյանն էլ Երևանի ավագանու ընտրությունների ժամանակ հեռախոսը խփել էր Շենգավիթի 255 մանկապարտեզում տեղակայված ընտրական հանձնաժողովի նախագահ, ՀՀԿ-ական Հասմիկ Ղազարյանի գլխին:

«էլ ո՞նց կարող էին ԲՀԿ-ականները ստորագրել այդ ձևաթղթի տակ, մանավանդ որ իրենց պապան՝ Քոչարյանն ու իր թիկնապահ «կոկոլները» «քաշքշել են» իրենց բարևած մարդուն»,- եզրակացրել է ՀԱԿ ներկայացուցիչը, հավելելով. էդ հլը մեր իմացածներն են, բա մեր չիմացածներն ինչքան կլինեն: