Ընտրությունները չպետք է վնաս հասցնեն ԼՂՀ ապագա կարգավիճակի որոշմանը. Քեթրին Էշթոն

Այսօր Լեռնային Ղարաբաղում նախագահական ընտրություններ են։ Եվրոպական միության արտաքին քաղաքականության հարցերով բարձր ներկայացուցիչ Քեթրին Էշթոնը երեկ այս կապակցությամբ հայտարարություն է տարածել, մասնավորապես, նշելով, որ Եվրոպական Միությունը չի ճանաչում այն իրավական և սահմանադրական նորմերը, որոնց շրջանակներում դրանք իրականացվելու են։ Քեթրին Էշթոնի խոսքերով, այս ընտրությունները չպետք է վնաս հասցնեն Լեռնային Ղարաբաղի ապագա կարգավիճակի որոշմանը հակամարտության խաղաղ կարգավորման շուրջ բանակցությունների ընթացքում։ Էշթոնը ևս մեկ անգամ հայտարարել է ԵԱՀԿ Մինսկի խմբին և հակամարտության խաղաղ կարգավորմանն ուղղված համանախագահների ջանքերին իր աջակցության մասին։

«Ես կողմերին կոչ եմ անում ակտիվացնել ջանքերը Մադրիդյան սկզբունքների հիման վրա հակամարտության լուծման ուղղությամբ», - ասել է Էշթոնը՝ նշելով, որ վերահաստատում է ԵՄ-ի՝ այս ուղղությամբ գործադրվող ջանքերին աջակցություն ցուցաբերելու պատրաստակամությունը։