Մեկ օրվա ընթացքում Սիրիայում զոհվել է ավելի քան 200 մարդ

Առնվազն 214 մարդ է սպանվել Սիրիայում չորեքշաբթի օրը՝ հուլիսի 18-ին, ընդդիմության և կառավարական ուժերի միջև ընթացող մարտերի ժամանակ, հաղորդում է Agence France-Presse-ը՝ վկայակոչելով իրավապաշտպաններին: Զոհվածների մեծ մասը՝ 124 մարդ, խաղաղ բնակիչներ են: Նախագահ Բաշար ալ-Ասադի կորուստներն ավելի լուրջ են. չորեքշաբթի օրը բախումները հետևանքով զոհվել է 62 զինվոր: Միևնույն ժամանակ սպանվել է 28 ընդդիմադիր:

Հիշեցնենք, որ մի քանի օր առաջ ընդդիմությունը զանգվածային հարձակումներ սկսեց կառավարական զորքերի վրա: Բացի այդ, հուլիսի 18-ին Դամասկոսում տեղի ունեցավ ահաբեկչական հարձակում, որի հետևանքով սպանվեց մի քանի բարձրաստիճան պաշտոնյա: Մասնավորապես, ռումբի պայթյունի հետևանքով սպանվել է Սիրիայի պաշտպանության նախարար Դաուդ Ռաջիհան: Ահաբեկչության համարպատասխանատվությունը իրենց վրա վերցրեցին երկու խմբավորում՝ Սիրիական ազատ բանակը և «Լիվա ալ-Իսլամի» իսլամիստները («Իսլամի ջոկատներ»):

Մինչդեռ այսօր՝ հուլիսի 19-ին, կկայանա ՄԱԿ-ի Անվտանգության խորհրդի՝ Սիրիայի հարցով նիստը: Հատուկ դեսպանորդ Քոֆի Անանի խնդրանքով այն հետաձգվել էր մեկ օրով: Արևմտյան երկրները մտադիր են համոզել Ռուսաստանին միանալ Բրիտանիայի առաջարկած բանաձևին: Այն ենթադրում է Ասադի ռեժիմի դեմ պատժամիջոցների կիրառում: Ռուսաստանն իր կողմից առաջարկում է ընդունել մեկ այլ բանաձև, որը սահմանափակվում է խաղաղապահ առաքելության ընդլայնմամբ:

Նշենք, որ տարբեր հաշվարկներով, Սիրիայում 2011-ից մինչ օրս ընթացող զինված հակամարտության զոհ է դարձել մոտ 13-17 հազար մարդ: