Վիլնյուսում բացվեց Հայաստանի դեսպանատունը

Նոյեմբերի 26-ին, Վիլնյուսում, Հայաստանի և Լիտվայի արտգործնախարարներ Էդվարդ Նալբանդյանի և Աուդրոնիուս Աժուբալիսի մասնակցությամբ, տեղի ունեցավ Լիտվայում ՀՀ դեսպանության պաշտոնական բացման արարողությունը, որին ներկա էին Լիտվայի խորհրդարանի անդամներ, ԱԳՆ բարձրաստիճան պաշտոնյաներ, հայ համայնքի ներկայացուցիչներ:

Բացման արարողությանն ելույթներով հանդես եկան Հայաստանի և Լիտվայի արտգործնախարարները և Լիտվայում Հայաստանի դեսպանը:

Իր խոսքում Արտգործնախարար Նալբանդյանը նշեց, որ խորհրդանշական է մեր երկու երկրների միջև դիվանագիտական հարաբերությունների հաստատման քսանամյա տարեդարձին Վիլնյուսում ՀՀ դեսպանության հիմնադրումը: Նալբանդյանը մասնավորապես ասաց. «Լիտվան առաջին երկիրն է, որ ճանաչել է Հայաստանի անկախությունը և Հայաստանի առաջին միջպետական պայմանագիրը ստորագրվել է Լիտվայի հետ։ Հայաստանի առաջին արտաքին գործերի նախարարի առաջին արտերկրյա այցն եղել է Լիտվա։ Լիտվան միակն է բալթյան երկրներից, որ դեսպանություն է հիմնել Հայաստանում և առայժմ միակն է բալթյան երկրներից, որտեղ Հայաստանը բացում է դեսպանություն։ Այս բոլոր փաստերը հստակորեն վկայում են մեր երկու երկրների միջև համագործակցության ընդլայնման և խորացման գործում մեր նպատակադրվածության մասին: Մենք ունենք ինտենսիվ քաղաքական երկխոսություն, որն իրականցվում է բարձր մակարդակի երկկողմ այցերի, արտգործնախարարությունների միջև խորհրդատվությունների միջոցով։ Այս տարի մենք պատիվ ենք ունեցել Երևանում հյուրընկալելու Նախագահ Դալիա Գրիբաուսկայտեին։ Նրա այցի ժամանակ Հայաստանի Նախագահը խոստացավ, որ մինչև տարվա վերջ Հայաստանը դեսպանություն կբացի Վիլնյուսում, և այժմ դա իրականություն դարձավ»։

Էդվարդ Նալբանդյանը շնորհավորեց նաև լիտվահայ համայնքին՝ դեսպանության բացման կապակցությամբ, հույս հայտնելով, որ լիտվահայությունը նոր եռանդով կնպաստի հայ-լիտվական հարաբերությունների զարգացմանը։

Իր խոսքում Լիտվայի արտգործնախարարը, հիշատակելով հայ-լիտվական պատմական առնչությունները, նշեց, որ Հայաստանի դեսպանության հիմնումը նոր էջ կբացի երկկողմ բարեկամական հարաբերություններում, և Լիտվայի իշխանություններն առավելագույնս կաջակցեն դեսպանատան գործունեությանը:

ՀՀ պետական օրհներգի հնչյունների ներքո՝ Լիտվայում ՀՀ դեսպան Արա Այվազյանը բարձրացրեց ՀՀ պետական դրոշը, որից հետո Հայ Առաքելական եկեղեցու հոգևոր հովիվ տեր Խոսրով Ստեփանյանը կատարեց դեսպանատան օծման կարգը: Այնուհետև՝ Հայաստանի և Լիտվայի արտգործնախարարները բացեցին ՀՀ դեսպանության ցուցատախտակը, որով ազդարարվեց դիվանագիտական ներկայացուցչության հիմնումը:

Բացման արարողությունից հետո տեղի ունեցավ Էդվարդ Նալբանդյանի և Լիտվայի արտգործնախարար, ԵԱՀԿ գործող նախագահ Աուդրոնիուս Աժուբալիսի հանդիպումը:

Ողջունելով Էդվարդ Նալբանդյանին՝ Լիտվայի արտգործնախարարը նշեց, որ ինքն ուրախ է Վիլնյուսում հանդիպել իր հայաստանցի գործընկերոջը՝ ՀՀ դեսպանության պաշտոնական բացման կապակցությամբ:

Արտգործնախարարները քննարկեցին երկկողմ հարաբերությունների զարգացմանն առնչվող հարցեր՝ առևտրատնտեսական, մշակութային, միջխորհրդարանական համագործակցության:

Հանդիպմանը քննարկվեցին ԵԱՀԿ ընթացիկ լիտվական նախագահության շրջանակներում ս.թ. դեկտեմբերի 6-7-ը Վիլնյուսում կայանալիք նախարարական խորհրդի հանդիպմանն առնչվող հարցեր: Աուդրոնիուս Աժուբալիսը բարձր գնահատեց Հայաստանի ներդրումը ԵԱՀԿ գործունեության մեջ՝ առանձնահատուկ ընդգծելով ՀՀ կառուցողական ներգրավվածությունը կազմակերպության կառույցներում:

Էդվարդ Նալբանդյանը ներկայացրեց ԼՂ հակամարտության կարգավորման գործընթացի վերջին զարգացումները, հաջորդ շաբաթ կայանալիք Մինսկի խմբի համանախագահների տարածաշրջանային այցելությունից առաջարկները:

Կողմերն անդրադարձան նաև միջազգային կազմակերպություններում երկկողմ համագործակցության հարցերին: