Աստղագետները կանխագուշակել են Յուպիտերի ապագան

Աստղագետները կանխագուշակել են, թե ինչ կլինի Յուպիտերի հետ, երբ Արեգակը սպառի իր վառելիքի մեծագույն մասը և վերածվի կարմիր հսկայի։ Աշխատանքն ընդունվել է տպագրության The Astrophysical Journal պարբերականում, իսկ առանձնատիպը հասանելի է Քորնելի համալսարանի արխիվում։ Հետազոտության համառոտ բովանդակությունը ներկայացնում է ScienceNow-ն։

Մեզ ամենամոտ աստղի՝ Արեգակի կողմից վառելիքի՝ ջրածնի սպառումն առաջին հերթին կհանգեցնի նրա չափերի հարյուրապատիկ կտրուկ ավելացման և ճառագայթվող էներգիայի աճի։ Այդ ընթացքում աստղի մակերևույթի և մոլորակի հեռավորությունը 765 միլիոն կիլոմետրից կկրճատվի մինչև 500 միլիոն կիլոմետրի, ինչն իր հերթին կհանգեցնի Յուպիտերի մակերևութային ջերմաստիճանի աճին մինչև 700°C՝ առաջ բերելով մոլորակի մուգ կարմիր ճառագայթում։

Նման փոփոխություններից հետո Արեգակնային համակարգի հսկան՝ Յուպիտերը կանցնի տաք յուպիտերների դասը. դրանք այն մոլորակներն են, որոնց գոյության հնարավորությունն ապացուցվել է դիտումների տվյալների շնորհիվ։ Առաջին նման արտամոլորակը (այլ աստղային համակարգի պատկանող մոլորակը - Ծ.Թ.) և հետագայում հայտնաբերված արտամոլորակների մի զգալի մասը պատկանել են հենց այս դասին։

Համարվում է, որ տաք յուպիտերները սովորաբար առաջանում են միջմոլորակային գազափոշային ամպի հետ շփման հետևանքով մոլորակի ուղեծրի սեղմման արդյունքում։ Ուղեծրի տրամագծի նվազմանը զուգահեռ աճում է նաև աստղից կլանվող էներգիայի քանակը, և, հետևաբար, մոլորակի ջերմաստիճանը։ Տվյալ աշխատության մեջ ցույց է տրված, որ տաք յուպիտերները կարող են կազմավորվել նաև ինչ-որ իմաստով հակառակ պրոցեսի՝ ոչ թե մոլորակի՝ աստղին մոտենալու, այլ աստղի՝ մոլորակին մերձեցման արդյունքում։