«Առաջնորդման մեթոդաբանությունը` ըստ Գարեգին Նժդեհի» խորագրով ծրագիր

Հայաստանի երիտասարդական հիմնադրամը և Հայաստանի պետական տնտեսագիտական համալսարանի ուսանողական խորհուրդն իրականացնում են «Առաջնորդման մեթոդաբանությունը` ըստ Գարեգին Նժդեհի» խորագրով ծրագիրը:

Դեռևս 2006 թվականին Հայաստանի պետական տնտեսագիտական համալսարանի ուսանողական խորհուրդը նախաձեռնել և իրականացրել է «Նժդեհյան իմաստաբանություն» գրքի տպագրման աշխատանքները, որը նվիրված էր մեծ զորավար, պետական-քաղաքական գործիչ Նժդեհի 120 ամյակին: Այս տարի նույնպես ուսանողական խորհուրդը նախաձեռնել է մեծ շուքով նշել մեծ հայրենասերի 125 ամյակը:

Ծրագրի շրջանակներում նախատեսվում է տպագրել «Առաջնորդման մեթոդաբանությունը՝ ըստ Գարեգին Նժդեհի» գիրքը, բացի այդ, կկազմակերպվի բեմականացում: Նշենք, որ «Առաջնորդման մեթոդաբանությունը՝ ըստ Գարեգին Նժդեհի» գրքի հեղինակը ՀՊՏՀ կառավարման ամբիոնի դոցենտ, փիլիսոփայության դոկտոր Վալերի Միրզոյանն է, սակայն մեծ է նաև ուսանողության ներդրումը, քանզի գիրքը տպագրվում է նրանց նախաձեռնությամբ և աջակցությամբ:

Նախօրոք բուհում հայտարարվել էր «Նժդեհը՝ որպես առաջնորդ» խորագիրը կրող հոդվածների մրցույթ, որոնցից շատերը հիմք են հանդիսացել գրքի ստեղծման համար: Գրքում հակիրճ շարադրվում և մեկնաբանվում է հայ երևելի քաղաքական, ռազմական, պետական գործիչ Գարեգին Նժդեհի հայեցակարգը՝ առաջնորդման էության, առաջնորդի բնութագրերի, իրավունքների և պարտականությունների, առաջնորդման մեթոդների մասին:

Բացի ուսանողներից՝ գիրքը հասցեագրված է նաև փիլիսոփաներին, կառավարման տեսաբաններին, կառավարիչներին, քաղաքական գործիչներին, պաշտոնյաներին, ձեռներեցներին, բոլոր այն անձանց, ովքեր գործ ունեն մարդկանց վարքի կառավարման խնդիրների հետ: Այն կարող է գործածվել նաև նժդեհագիտության հետագա հետազոտություններում, բուհական մի շարք դասընթացներում՝ որպես մեթոդաբանական ձեռնարկ: