ԼՂՀ-ում տեղամասերը փակվելուց հետո ընտրողների թվերը սկսել են լողալ

ԼՂՀ կենտրոնական ընտրական հանձնաժողովի կայքում հրապարակված աղյուսյակում, ուր բերված են Արցախի Հանրապետությունում ընտրողների թվերը և մասնակցության քանակը` ըստ շրջանների, տեղի են ունենում զարմանալի փոփոխություններ:

Տեղամասերը փակվելուց հետո՝ ժամը 21:00-ին, ԼՂՀ ԿԸՀ-ն հրապարակեց ընտրողների մասնակցությունը (ըստ շրջանների), որում արդեն իսկ կային զարմանալի անոմալիաներ: Մասնավորապես, Երևանում ԼՂՀ ներկայացուցչությունում բացված տեղամասում ընտրողների մասնակցությունը 107 տոկոս էր, ինչի մասին քիչ առաջ հայտնեցինք:

Վերջին մեկ ժամում կայքում փոխվեց ոչ միայն ընտրությանը մասնակցած անձնաց քանակը (թեև տեղամասերը արդեն 2 ժամ է, ինչ փակվել են), այլև ընտողների քանակն՝ ըստ ընտրական ցուցակների:

Այսպիսով՝ ԼՂՀ-ում տեղամասերը փակվելուց հետո վերջին մեկ ժամում բավականին փոփոխվել է ընտողների թիվը (ըստ ընտրական ցուցակների): 99.254 ընտրողի փոխարեն Արցախում ներկա դրությամբ կա 99.190 ընտրող: Իսկ մասնակիցների թիվը 72.833-ից պակասեց մինչև 72.823: Նշենք, որ ընտրական ցուցակները ձևավորվում են քվեարկության օրվանից մի քանի օր առաջ և որևէ տեղամասից ստացված կամ չստացված ճիշտ կամ սխալ տվյալ չեր կարող պակասեցնել Արցախում ընտրական իրավունք ունեցող քաղաքացիների թիվը:

Ընտրողների թիվը փոփոխվել է նաև  Ասկերանի, Հադրութի, Մարտակերտի, Մարտունու, Շահումյանի և Շուշիի շրջաններում: