Թուրքիայում հայկական արմատներ ունենալու մեղադրանքը նսեմացնելու ակտուալ գործիք է

Լրագրողների հետ հանդիպմանը թուրքագետ Անուշ Հովհաննիսյանը խոսեց Էրդողանի կողմից Դերսիմի կոտորածների համար ներողություն խնդրելու քաղաքական նպատակների, այդ հարցը Մեծ Եղեռնի ենթատեքստում դիտարկելու և Թուրքիայի տարածքում ապրող թաքնված հայերի մասին։

Այն հարցին, թե ինչպե՞ս է ինքը մեկնաբանում Էրդողանի վերջին հայտարարությունը, Անուշ Հովհաննիսյանը պատասխանեց, որ մի քանի օր է՝ մամուլը անդրադառնում է Էրդողանի ներողության ակցիային՝ տարբեր՝ շատ անգամ չափազանցված գնահատականներով։ «Ես կարծում եմ՝ այդ արարքին այսքան լուրջ նշանակություն տալը սխալ է։ Ներողության ձևը, որի համար պետական ամբիոն չէր ընտրված, այլ կուսակցական ժողով, նշանակում է, որ խնդիրը չպետք է դիտարկել չափազանցված կոնտեքստով, այլ ավելի շատ թուրքական ներքին խմորումների համատեքստում՝ որպես կուսակցական պայքարի մի դրվագ», - ասաց տիկին Հովհաննիսյանը։ Նա ասաց, որ Էրդողանի «Արդարություն և զարգացում» և Թուրքիայի Ժողովրդա-հանրապետական կուսակցությունների պայքարի այս տեսակն սկիզբ է առել դեռևս 2009 թ.-ի ՏԻՄ ընտրությունների ժամանակ, և այս քայլը հակառակորդ կուսակցությունը պառակտելու ու նրա առաջնորդին նսեմացնելու ևս մեկ փորձ էր, քանի որ նման դեպքեր էլի են եղել՝ շահարկելով Ժողովրդա-հանրապետական կուսակցության առաջնորդ Քըլըչդարօղլուի՝ Դերսիմից լինելու հանգամանքը կամ հայկական արմատներ ունենալու մեղադրանքներ հնչեցնելով։

«Թուրքիայում հայկական արմատներ ունենալու մեղադրանքը դեռևս վարկաբեկելու և նսեմացնելու ակտուալ գործիք է», - ասաց բանախոսը, - «իսկ այդ ներողությունը փարիսեցիության է նման, քանի որ նույն պահին թուրքական ժանդարմերիան և զինված ուժերը նույն Դերսիմում մաքրման աշխատանքներ էին տանում ՔԲԿ-ականների դեմ։ Այստեղ ցանկանում են նաև սեպ խրել ալեվիների և ՔԲԿ-ի համակիրների միջև։ ՔԲԿ-ն հեշտությամբ Դերսիմից զինյալներ է հավաքում կամ օգտագործում տարածքը, քանի որ Դերսիմը միշտ ընդդիմադիր կեցվածք է ունեցել, Եղեռնի ժամանակ այնտեղ բազմաթիվ հայեր են փրկվել, իրենց հայկական արմատները գիտակցողների թիվն է շատ և հայկականության հանդեպ համակրանքը մեծ է»։

Ըստ Անուշ Հովհաննիսյանի՝ Դերսիմի դեպքերն երկու կուսակցությունների կողմից էլ օգտագործվում են սեփական շահերի համար։ Քըլըչդարօղլուն էլ իր հերթին մեղադրում է Էրդողանի կուսակցությանը՝ քրդական հարցը լուծել չկարողանալու համար։