Էրդողանը ցանկանում է նոր Աթաթու՞րք դառնալ

Թուրքիայի վարչապետ Ռեջեփ Թայիփ Էրդողանը ցանկանում է նոր Աթաթուրք դառնալ. այդպես է կարծում թուրքագետ Անուշ Հովհաննիսյանը։

Էրդողանի կողմից Դերսիմի կոտորածների համար ներողություն խնդրելու թեմայով քննարկման ժամանակ թուրքագետն ասաց. «Եթե ելույթի տեսագրությունը տեսել եք, Էրդողանի հետևում երկու մեծ նկարներ են, որոնցից մեկը Քեմալ Աթաթուրքի նկարն է, իսկ մյուսն իր՝ Էրդողանի նկարը՝ նույն չափերով։ Նման քայլերով փորձ է արվում աստիճանաբար փոխել հանրապետության հիմնադրի կերպարի հանդեպ վերաբերմունքը»։

«Վերջին տարիներին ընդհանրապես Թուրքիայում Աթաթուրքի, նրա հիմնադրած պետության և կուսակցության ապաառասպելացման գործընթաց է ընթանում», - ասաց բանախոսը։

Լրագրողների հարցին, թե ինչպե՞ս է նա մեկնաբանում Թուրքիայի խորհրդարանում օսմանյան սուլթանի մահվան տարելիցը նշելը, որը շատ լրատվամիջոցներում բնորոշվում է որպես վերադարձ օսմանիզմին, տիկին Հովհաննիսյանը պատասխանեց. «Թուրքիայում ինքնության ճգնաժամ է։ Երկրի արտաքին քաղաքականությունը շատերն են մոտ համարում նեոօսմանիզմին, բայց նույն գործընթացները նաև ներքին կյանքում են։ Օսմանյան անցյալը դիտվում է որպես քեմալականության արհեստականության ապացույց։ Համարվում է, որ քեմալականությունը խախտել է Թուրքիայի զարգացման բնականոն ընթացքը։ Բազմաթիվ մեղադրանքներից է նաև օսմանյան վերջին սուլթանի և նրա ընտանիքի արտաքսումն երկրից՝ վերադառնալու արգելքով։ Թուրքական ինքնության ճգնաժամի հարցերից մեկն էլ այն է, որ նրանք փորձում են պարզել՝ ժամանակակից Թուրքիան Քեմալ Աթաթուրքի ստեղծած պետությո՞ւնն է, թե՞ այն, ինչ եղել է մինչ այդ և ցանկանում է դառնալ»։